खुट्टा भाँचिदा पनि हेलिकोप्टर चार्टर गर्न बाध्य

गोरखा : दुवै खुट्टा अपाङंग भएका गोरखा काशिगाउँका एक किशोर लडेर खुट्टा भाँचिएपछि हेलिकोप्टर चार्टर गरेर उपचार गर्न लगिएको छ ।
खुट्टा भाँचिएका अपांङग धार्चे ६ काशिगाउँका १८ बर्षका सुक्सिङ गुरुङलाई लाप्राकका इत्त गुरुङको आर्थिक सहायतामा हेलिकोप्टर चार्टर गरेर उपचार गर्न लगिएको वडा अध्यक्ष धनप्रसाद घलेले जानकारी दिए ।
सुक्सिङ चन्द्रदेवी निमाविमा कक्षा ३ मा अध्ययनरत छन् । आइतबार बिहान १० बजे बैशाखी टेकेर पढ्न जाने क्रममा लडेर उनको खुट्टा भाँचिएको थियो । आर्थिक अबस्था ज्यादै कमजोर भएको र गाउँमा स्वास्थ्य सेवा नभएकाले दिनभरी सहयोगी खोजी तीनबजेतिर फिस्टेल एयरको हेलिकोप्टर चार्टर गरी उपचार गर्न बनेपा अस्पताल लगिएको वडा अध्यक्ष घलेले बताए ।
काशिगाउँ आसपास स्वास्थ्यचौकी बाहेक अस्पताल छैन । सदरमुकामसम्म जोडिने मोटरबाटो पनि छैन । सामान्य उपचार गर्न पनि महंगो शुल्क तिरेर हेलिकोप्टर चार्टर गर्न बाध्य हुनुपरेको वडा अध्यक्ष घलेले बताए ।