सिटी सफारी चार्ज गर्दा करेन्ट लागेर मृत्यु
विराटनगर : मोरङको सुन्दरहरैंचा नगरपालिका ५ मा आइतबारराति करेन्ट लागेर एक जनाको मृत्यु भएको छ ।राति १० बजे करेन्ट लागेर ३२ वर्षीय प्रकाश थापाको मृत्यु भएको इलाका प्रहरी कार्यालय बेलबारीका प्रहरी निरीक्षक रामजी कटुवालले बताए । आफ्नै सिटी सफारीको ब्याट्री चार्ज गर्ने क्रममा विद्युत प्रवाह भइरहेको नाङ्गो तारले भेटेपछि थापालाई करेन्ट लागेको थियो ।
करेन्ट लागेर गम्भीर घाइते थापाको उपचारका क्रममा बीपी कोइराला स्वास्थ्य विज्ञान प्रतिष्ठान धरानमा राति साढे ११ बजे मृत्यु भएको प्रहरी निरीक्षक कटुवालले बताए ।
त्यस्तै विराटनगर ५ जामुनगाछीमा घरको छतबाट खसेर एक युवा गम्भीर घाइते भएका छन् । आफ्नै एक तले घरको छतबाट खसेर राति १० बजे २८ वर्षीय सुदीप लम्साल घाइते भएको प्रहरीले जनाएको छ । लम्सालको देव्रे तिघ्रा भाँचिनुका साथै शरीरका विभिन्न भागमा चोट लागेको छ । लम्सालको नोवेल मेडिकल कलेजमा उपचार भइरहेको प्रहरीले जनाएको छ ।
प्रतिक्रिया दिनुहोस !
