रामाल्लाह (प्यालेस्टाइन) : जोर्डनका राजा अब्दुल्लाह द्धितीयले प्यालेस्टाइनका राष्ट्रपति महम्मद अब्बासलाई भेट्नेगरी सोमबार दुर्लभ भ्रमण सुरु गरेका छन् ।
अब्बासको मुख्यालयमा उनको पाँच बर्षपछिको पहिलो भ्रमणमा अब्दुल्लाहलाई रातो कार्पेटमा स्वागत गरेका थिए ।
राजाको हेलिकोप्टर नजिकैबाट राष्ट्रपति अब्बासले स्वागत गर्दा प्यालेस्टिनीका नेताहरु पनि थिए भने गीतसंगीत पनि घन्किएको थियो । आत्मीयता दर्शाउने गरी दह्रो हात मिलाएका दुवै जनाले सञ्चार माध्यमहरुलाई भने प्रतिक्रिया दिएनन् ।
इजरायलसँग जोर्डनको तनाव बढ्दै गएकाले त्यसैका बारेमा छलफल गर्न जोर्डनका राजा प्यालेस्टाइन गएको अधिकारीहरुले बताएका छन् ।
गत जुलाई २३ मा इजरायलको एक जना सुरक्षा गार्डले इजरायलको दूतावास परिसरमा जोर्डनका दुई जना नागरिकलाई गोली प्रहार गरी हत्या गरेपछि इजरायल र जोर्डनबीच तनाव बढेको हो ।
ती दुई जना जोर्डनी नागरिकले इजरायली सुरक्षाकर्मीलाई पहिला आक्रमण गरेपछि जवाफी सुरक्षा कारबाहीमा उनीहरु मरेको इजरायली अधिकारीहरुले बताएका छन् ।
तर जुलाई २७ मा इजरायलका प्रधानमन्त्री बेन्जामिन नेतान्याहुले दूताबासमा अनुसन्धान गर्ने प्रतिबद्धता जनाएपछि भने तनाव कम भएको थियो ।
अब्दुल्लाहको भ्रमण अब्बासलाई सहयोग उपलब्ध गराउनेमा केन्द्रित हुने जस्तो देखिने विश्लेषण गरिएको छ । रासस/सिन्ह्वा
प्रतिक्रिया दिनुहोस !
