काठमाडौं: नबिल बैंकले आफ्नो ३३औं वार्षिक उत्सवको अवसर पारेर वृक्षरोपण तथा सरसफाइ कार्यक्रम आयोजना गरेको छ। बैंकले ३३औं वार्षिकोत्सवका अवसरमा वातावरण संरक्षण र हरियाली जोगाउन सहयोग गर्ने उद्देश्यले शनिबार मीनभवन नजिकको वागमती नदी किनारमा वृक्षरोपण तथा सरसफाइ कार्यक्रम सञ्चालन गरेको हो।
बैंकको ३०औं वार्षिकोत्सवको उपलक्ष्यमा २०७१ साउनमा पनि यस क्षेत्रमै वृक्षरोपण गरेको थियो। त्यसयता बैंकले यस क्षेत्रमा नियमित रूपमा वृक्षरोपण कार्यक्रम आयोजना गर्दै आएको जनाएको छ। स्थानीयको सुविधाका लागि एउटा सानो चौतारी निर्माण गर्ने र वृक्षरोपण गरिएको क्षेत्रलाई फलामे तारबार लगाई सुरक्षित गर्ने काम सुरु गरिएको छ।
बैंकका अध्यक्ष शम्भुप्रसाद पौड्यालले बैंकका सञ्चालक, प्रमुख कार्यकारी अधिकृत तथा ठूलो संख्यामा रहेका बैंकका कर्मचारीको उपस्थितिमा चौतारीको शिलान्यास गरेका थिए।
नबिल बैंकले आफ्नो संस्थागत सामाजिक उत्तरदायित्वअन्तर्गत विभिन्न शैक्षिक क्रियाकलाप, विज्ञान तथा प्रविधि, स्वास्थ्य, साहित्य तथा कला, वातावरणलगायत क्षेत्रमा सहयोग गरी सामाजिक कल्याणका काममा निरन्तर लागिरहने जनाएको छ।
प्रतिक्रिया दिनुहोस !
