बेतान कर्णाली जलविद्युत् आयोजना : सञ्चयकोषले ८० अर्ब लगानी गर्ने

काठमाडौं : कर्मचारी सञ्चय कोषले ८० अर्ब रुपैयाँ लगानीमा ६ सय ८८ मेगावाटटको बेतान कर्णाली जलविद्युत् आयोजना निर्माण गर्ने भएकोे छ । कोषका करिब ६ लाख सञ्चयकर्ताले पाउने मुनाफा आयोजनामा लगानी गरिनेछ ।

कोषले वार्षिक मुनाफाबाट सञ्चयकर्तालाई प्रदान गर्दै आएको रकम जलविद्युत् आयोजनामा लगानी गर्ने योजनाअनुसार बेतान कर्णाली सञ्चयकर्ता जलविद्युत् आयोजना निर्माण कार्य अघि बढाइएको हो । सञ्चयकर्ताको योगदानबाट प्राप्त मुनाफाका आधारमा परियोजनामा सेयर हिस्सा रहने कोषका प्रशासक कृष्णप्रसाद आचार्यले बताए । साँझपख अत्यधिक विद्युत् खपत हुने समय (पिक आवर)मा बिजुली उत्पादन गर्ने गरी आयोजना निर्माण गर्न लागिएको हो ।

स्वदेशी लगानीमा निर्माण गर्न लागिएको आयोजनामा निजामती कर्मचारी, नेपाल प्रहरी, नेपाली सेना, सशस्त्र प्रहरी बल र कोषमा कोष कट्टी गर्दै आएका संगठित संस्थाका करिब ६ लाख सञ्चयकर्ताको लगानी रहनेछ । आयोजना सात वर्षभित्र पूरा गर्ने लक्ष्य छ । आयोजनाबाट सुक्खा मौसममा एक अर्ब ४९ कराड २० लाख युनिट र वर्षायाममा दुई अर्ब ७७ करोड ३० लाख युनिट विद्युत् उत्पादन हुने अनुमान छ । आयोजनाको कार्ययोजना तयार भइसकेको छ ।

आयोजनामा निजामती कर्मचारी, नेपाल प्रहरी, नेपाली सेना, सशस्त्र प्रहरी बल र कोषमा कोष कट्टी गर्दै आएका संगठित संस्थाका करिब ६ लाख सञ्चयकर्ताको लगानी रहनेछ ।

अब छिट्टै विस्तृत अध्ययन प्रतिवेदन तयार गरी काम अघि बढाउने आचार्यले जानकारी दिए । कोषले २० अर्ब रुपैयाँ अधिकृत पुँजी राखेर आयोजना निर्माण गर्ने तयारी गरेको छ । आयोजनामा ४० प्रतिशत सञ्चयकर्ताको, १५ प्रतिशत सञ्चयकोषको, १० प्रतिशत नेपाल विद्युत् प्राधिकरणको, विद्युत् उत्पादन कम्पनीको १० प्रतिशत र केही स्थानीयको सेयर रहने कोषले जानकारी दिएको छ ।

सरकारले १० हजार आठ सय मेगावाट क्षमताको कर्णाली चिसापानी जलविद्युत् आयोजना अघि बढाएमा बेतानलाई केही असर पर्ने देखिन्छ । बेतान कर्णाली आयोजना राज्य र लगानीकर्ता दुवैलाई फाइदाजनक हुने आचार्यले बताए ।