बर्षाका कारण घर भत्किदा दुई जनाको मृत्यु

बागलुङ : बागलुङ जिल्लाको गलकोट नगरपालिका वाड नम्बर ९ बडागाउमा शुक्रबार बिहान अविरल बर्षाका कारण घर भत्किदा दुई जनाको ज्यान गएको छ । बिहान करिब २ बजेको समयमा घर पछाडीपट्टीको गाह्रो भत्किदा पुरिएर ७५ वर्षीय जयलाल विक र उहाँका नाति १३ वर्षीय विवेक विकको घटनास्थलै ज्यान गएको इलाका प्रहरी कार्यालय हरिचौरले जनाएको छ ।

घरमा जयलाल सहित उहाँका नाति बस्दै आइरहेका थिए । बिहीबार राति ११ बजेसम्म विवेक आफन्तकहाँ टेलिभिजन हेरेर फर्केका थिए । बिहान अबेर सम्म पनि घरमा दुवै जना नउठेको देखेपछि आफन्तले हेर्ने क्रममा पुरिएको अवस्थामा देखेको स्थानीय प्रदिप सुनारले बताए । स्थानीय र प्रहरीको सहयोगमा निकालिएको जयलाल र विवेकको शव पोष्टमार्टमका लागी गलकोट प्राथमिक स्वाथ्य केन्द्र हरिचौरमा लगिएको छ ।

यसैबिच गलकोट नगरपालिकाले मृतक परिवारका लागि तत्काल राहत स्वरुप ३० हजार प्रदान गर्ने बताएको छ । घटनास्थलको स्थलगत अवलोकन गरि गलकोट नगरपालिकाका नगर प्रमुख भरत शर्मा गैरेले तत्कालका लागि राहत स्वरुप ३० हजार प्रदान गर्ने जानकारी दिए ।