बबई नदीमा पानीको सतह उच्च

बर्दिया : अविरल वर्षाका कारण बबई नदीमा पानीको सतह वढेको छ । २४ घण्टादेखि बबई तटीय क्षेत्रहरु चेपाङ्ग, तुल्सीपुर, घोराई, पदमपुर, अम्वापुर लगायतका क्षेत्रहरुमा मुसलधारे वर्षाका कारण बबई नदीमा पानीको सतह बढेको हो ।

उक्त स्थानहरुमा २४ घण्टामा १५० मिलिमिटर भन्दा वढी वर्षा भएको छ । अम्वापुरमा भने सवैभन्दा बढी २८२ दशमलव २० मिलिलिटर वर्षा भएको जनाइएको छ । बबई चेपाङ्गमा पानीको सतह खतराको तह पार गरेको छ । उक्त क्षेत्रमा नदीको चेतावनी तह ५ दशमलव ५० मिटर र खतरा तह ६ दशमलव १० मिटर हो । शनिबर बिहानको मापन अनुसार बबई चेपाङ्गमा पानीको सतह खतरा तह पार गरी ६ दशमलव ६२ मिटर पुगेको छ ।

बबई भादा पुलमा पानीको सतह चेतावनी तह पार गरेको जनाइएको छ । उक्त क्षेत्रमा ७ मिटर चेतावनी तह हो । बिहानको मापन अनुसार ७ दशमलव २९ मिटर पानीको सतह पुगेको छ । भादापुलमा ८ मिटर पानीको सतहलाई खतरा मानिन्छ ।

बबई चेपाङ्गको पानी भादापुलमा आईपुग्न ६ घण्टा समय लाग्ने भएकाले त्यस क्षेत्रमा बाढी आउने सम्भावना बढेर गएको स्थानीय प्रशासनले जनाएको छ । प्रसासनले नदी तटीय क्षेत्रका वासीन्दाहरुलाई सुरक्षित रहन आग्रह गरेको छ । बबई नदीमा पानीको सतह बढेसँगै बर्दियाका धेरैजसो गाउँहरु डुवानमा पर्ने जोखिम रहन्छ ।