पहिरोले दुई वटा खानेपानीको मुहान बगाँयो

फिदिम : केहिदिन यताको अविरल बर्षातको कारण फालेलुङ गाँउपालिकाको विभिन्न स्थानमा गएको पहिरोले पानीको मुहान सहित जलाशययुक्त टयाङकी बगाउँदा खानेपानीको हाहाकार भएको छ । शुक्रबार विहान गएको पहिरोले फालेलुङ ३ माङ्लेबु र खोलाघारीमा सञ्चालित दुई वटा खानेपानी आयोजनाको मुहान बगाँउदा यहाँका एक सय ८३ घरपरिवारमा खानेपानीको समस्या भएको हो ।

फालेलुङ गाँउपालिका वडा नं. ३ का वडाध्यक्ष बीरविक्रम थाम्सुहाङका अनुसार गोर्खा वेलफेर स्किमले डेढ बर्ष अघि निर्माण गरेको माङ्लेबुङ खानेपानी आयोजना र दुई बर्ष अघि निर्माण गरिएको खोलाघारी खानेपानी आयोजना शुक्रबार विहानको पहिरोले बगाएको हो । माङ्लेबुङ खानेपानी आयोजनाको तीन स्थानबाट मुहान थापिएको छ । तीन वटै स्थानको मुहान पहिरोले बगाएको हो ।

पहिरोले मुहान बगाँउदा गलथले मुहानको पानी उपभोग गर्ने ४२ घर, जुँगेडाँडा मुहानको पानी उपभोग गर्ने २२ घर र साक्सिङबोटे मुहानको पानी उपभोग गर्नेे १९ घरपरिवारमा खानेपानीको समस्या भएको हो । त्यस्तै खोलाघारी खानेपानी आयोजनाको पानी उपभोग गर्दै आएका एक सय घरले खानेपानीको अभाव झेल्नुपरेको छ ।

‘अहिले पनि मुसलधारे बर्षा भइरहेको छ,’ थाम्सुहाङले फोन सम्पर्क गर्दै अन्नपूर्णसँग भने ‘आकाशको पानी थापेर पानी खाइदैछ । छेउछाउमा भएका सबै पानीका मुहानहरु धमिलिएका छन् ।’ धारामा २४ घण्टा पानी आउने भएकाले यसअघि यहाँका स्थानीयहरुले पानी थापेर राख्ने गरेका थिएनन् । आवश्यकता परेको बेला धाराबाट नै पानी थापेर काम चलाउने भएपछि यहाँका मानिसहरुको घरमा कसैले पनि पानी थापेर नराखेकाले झन समस्या भएको स्थानीयहरु बताउँछन् ।

जिल्लाबाट निकै दुर्गम मानिएको फालेलुङको माथिल्लो क्षेत्रमा उद्धार टोली पनि अहिलेसम्म पुग्न नसकेको स्थानीयको आरोप छ । ‘गाँउपालिका जनप्रतिनिधिहरु जोखिम मोलेर गाँउ घुम्दै क्षतीको विवरण संकलन गर्दैछन्’ स्थानीय छविलाल नेपालले भने ‘पहिरो जताभावि गएकाले सडक पनि भत्किएको छ , कतैबाट पानी ल्याउने सम्भावना पनि छैन ।’

पानी परिरहेकाले अहिले नै खानेपानीको ठूलो समस्या नभएपनि पानी पार्न थालेपछि ठूलै सामस्या हुने पाँचथरका प्रमुख जिल्ला अधिकारी विनोद कुमार खड्काले बताए । पहिरो प्रभावित क्षेत्रमा उद्धारका लागि सुरक्षा टोली खटाइएपनि पानी पर्न नरोकिएकाले उद्धारमा समस्या भएको उनले बताए ।