बाँकेलाई होटल ‘हब' बनाउन अभियान

नेपालगन्ज : बाँकेलाई होटल व्यवसायको केन्द्र बनाउन व्यवसायीले अभियान सुरु गरेका छन् । बाँके जिल्लामा होटल व्यवसाय फस्टाउँदै गएको छ । पर्यटकको ‘ट्रान्जिट प्वाइन्ट'का रूपमा विकास हुन थालेको बाँकेको नेपालगन्ज, कोहलपुरलगायत क्षेत्रमा अहिले तारे होटल थपिइरहेका छन् । भएका होटलले पनि स्तर बढाएर सेवा विस्तार गर्दै छन् । पर्यटक बढ्दै जाँदा ग्राहकलाई कसरी बढीभन्दा बढी सेवासुविधा दिन सकिन्छ भनेर यस क्षेत्रका होटल व्यवसायी संगठित भइरहेका छन् ।

बर्दिया राष्ट्रिय निकुञ्ज, रारा, फोक्सुन्डो, कर्णाली चिसापानीलगायत पर्यटकीय क्षेत्रको प्रवेशद्वार भएकाले पनि बाँकेमा होटल व्यवसायको सम्भावना प्रचुर देखिएको हो । देश संघीयतामा गएसँगै प्रदेशस्तरमा होटल क्षेत्रको व्यावसायिक विकास गर्ने उद्देश्यले विभिन्न गतिविधि सञ्चालन गरिरहेको होटल एसोसियसन नेपाल (हान) पनि यो क्षेत्रमा आकर्षित भएको छ ।

प्रदेशमा होटल क्षेत्रको व्यावसायिक विकास गर्ने उद्देश्यसहित सम्बन्धित क्षेत्रका व्यवसायीसँग छलफल थालेको हानका पदाधिकारीले हालसालै बाँके र बर्दियाका होटल व्यवसायीसँग छलफल गरेर यहाँको वस्तुस्थितिबारे जानकारी लिएका छन् । संगठित रूपमा होटल उद्योगको विकासका लागि संघलाई प्रादेशिक संरचनामा लैजाने हानको योजनाअनुसार प्रदेश नं. ५ मा यस क्षेत्रका होटल तथा पर्यटन व्यवसायीको भेलाबाट असितशमशेर जबराको अध्यक्षतामा १३ सदस्यीय क्षेत्रीय होटल एसोसियसन पनि गठन गरेको छ ।

पर्यटकको ‘ट्रान्जिट प्वाइन्ट'का रूपमा विकास हुन थालेको बाँकेको नेपालगन्ज, कोहलपुरलगायत क्षेत्रमा अहिले तारे होटल थपिइरहेका छन् ।

प्रदेशमा आम्दानीको मुख्य स्रोत पर्यटन भएको र होटल व्यवसायबाट चाँडो प्रतिफल आउने भएकाले ती क्षेत्रमा लगानीको अवस्था के छ ? सरकारको भूमिका कस्तो हुने हो ? भन्नेबारे बाँके र बर्दियामा हानको अगुवाइमा बृहत् छलफल गरिएको छ । विधान संशोधन गरेर प्रादेशिक संरचनाअनुरूप बनाउने आफ्नो योजना र लगानीको अवसरबारे सरकारलाई अवगत गराइसकेको हानका महासचिव विनायक शाहले बताए ।

छलफलमा विमानस्थल व्यवस्थापनको सुधार, स्थलमार्ग भएर आउने पर्यटकका लागि सीमा नाकामा सुविधायुक्त व्यवस्था, होटल उद्योगमा दक्ष जनशक्ति र आवश्यक पूर्वाधारको उपलब्धता कसरी गराउन सकिन्छ भन्नेबारे मन्थन भएको थियो । होटल एसोसियसन नेपाल प्रदेश नं. ५ का महासचिव सरोजकुमार चन्दले हानका केन्द्रीय पदाधिकारीसँगको छलफल र उनीहरूबाट होटल उद्योगको विकासमा भइरहेको पहलबाट आफू उत्साही भएको बताएका छन् ।

‘पहिलो कुरा त हामी यस क्षेत्रको होटल उद्योगको विकासका लागि संस्थागतरूपमा संगठित भएका छौं', चन्दले भने, ‘केन्द्रीय पदाधिकारी ज्यूले पनि होटल व्यवसायको विकासका लागि विस्तृत कार्ययोजनासहितका प्रस्ताव राख्नुभएको छ । जुन निकै सकारात्मक छन् ।'

होटल एसोसियसन नेपाल (हान) प्रदेश नं. ५ गठन भएसँगै नेपालगन्जमा यसको कार्यालय खोल्ने र योजना बनाउने काम सुरु भइसकेको छ । हान प्रदेश नं ५ का महासचिव चन्दका अनुसार चाँडै नै जमुनाहा नाकामा टुरिस्ट लाउन्ज खोल्ने, एयरपोर्टमा टुरिस्ट इन्फरमेसन सेन्टर सञ्चालनमा ल्याउने तयारी भइरहेको छ।