आन्तरिक उडान अस्तव्यस्त

काठमाडौं : अबिरल वर्षा र बाढीपहिरोका कारण देशका अधिकांश स्थानको आन्तरिक उडान अवरुद्ध भएको छ । तराई र पहाडी दुवै क्षेत्रका विमानस्थलमा जहाज उडान र अवतरण गर्न सक्ने अवस्था नरहेपछि अधिकांश विमानस्थलमा सेवा प्रभावित भएको विमान कम्पनीले जानकारी दिएका छन् ।

मनसुनकै कारण शनिबार विराटनगर, लुक्ला, तुम्लिङटार, भद्रपुर र सिमरामा उडान भएन । यसका कारण हजारौं यात्रु अलपत्र परेका छन् । भैरहवा, नेपालगन्ज, जनकपुर, धनगढी, पोखर, भरतपुरलगायत विमानस्थलमा भने आंशिक रूपमा उडान भइरहेको छ । आन्तरिकतर्फ ५० प्रतिशतभन्दा कम उडान भएको त्रिभुवन विमानस्थल कार्यालयका प्रवक्ता प्रेमनाथ ठाकरले जानकारी दिए । शनिबार भरपुरमा सात, धनगढीमा चार, नेपागन्ज सात, जनकपुरमा दुई, पोखरामा १२ र भैरहवामा १४ उडान भएका थिए ।

आइतबार भने विराटनगर, लुक्ला र तुम्लिङटार बाहेक सबै विमानस्थलमा उडान भएका छन् । उडान भएका विमानस्थलमा पनि मौसमको प्रतिकूलताका कारण पूर्ण रूपमा उडान हुन सकेको छैन । मौसम अनुकूल भएको अवस्थामा केही समय ‘डिले' गरेर भए पनि उडान सुचारु भइरहेको ठाकुरले बताए । आइतबार नेपालगन्ज विमानस्थलमा बिहान उडान भए पनि दिउँसोदेखि उडान अवरुद्ध भएको ठाकुर बताउँछन् ।

०विराटनगर विमानस्थल सञ्चालन अनिश्चित

पूर्णरूपमा हवाई सम्पर्क विच्छेद भएको विरानगर विमानस्थलमा अझै उडान हुन सक्ने अवस्था छैन । विमानस्थलमा तीन फिटभन्दा बढी पानी जमेको छ । जमेको पानीले विमानस्थलमा के कति क्षति भयो,त्यसको विवरण आउन सकेको छैन । बन्द विमानस्थल तत्काल सुचारु गर्ने संस्कृति, पर्यटन तथा नागरिक उड्डयन मन्त्री जितेन्द्रनारायण देवले निर्देशन दिएका छन् । विमान सञ्चालकले भने केही दिन विराटनगर विमानस्थलमा उडान नै नगर्ने बताइसकेका छन् । तर, हवाई सेवा प्रदायक कम्पनीले केही दिन उडान नगर्ने जनाइसकेका छन् ।

शनिबार तराईका जिल्लामा पर्ने विमानस्थलको उडानमा केही समस्या सिर्जना भए पनि आइतबारबाट विस्तार उडान समान्य हुँदै गएको त्रिभुवन विमानस्थलका कार्यालयका प्रवक्ता ठाकुर बताउँछन् । ‘मौसम अनुकूल हेरेर एयरलाइन्स कम्पनीले उडान गरिरहेको छन', उनले भने, ‘विराटनगर विमानस्थलमा भने आइतबार पनि उडान सम्भव छैन, विमानस्थलमा तीन फिटभन्दा बढी पानी जमेको छ ।'

विराटनगर विमानस्थलको अवस्थालाई मध्यजनर राख्दै सौर्य एयरलाइन्सले मंगलबारसम्म उडान नगर्ने जनाएको छ । सौर्यले विराटनगरमा दैनिक दुईवटा उडान गर्दै आएको थियो । सौर्यले झापाको भद्रपुरमा भने मौसम अनुकूल भएकाले अवस्थामा उडान गरेको जनाएको छ ।

यस्तै सौर्यले नेपालगन्ज र भैरहवाका पनि मौसम अनुकूल समयमा उडान गरेको एयरलाइन्सको बजार व्यवस्थापक प्रमुख मुकेश खनालले जानकारी दिए । उडान भनेकै समयमा हुने अवस्थामा भने निकै नै कम छ । यात्रुले उडान नभएको अवस्थाका टिकट अन्य मितिका लागि सार्न चाहेको अवस्थामा सार्ने र रद्द गर्दै रकम फिर्ता लिन चाहेको अवस्थामा पूरै रकम फिर्ता गरेको खनालले जानकारी दिए ।

आन्तरिक उडानमा सबैभन्दा बढी हिस्सा आगट्न सफल बुद्ध एयरलाइन्सले पनि विराटनगर विमानस्थलमा केही दिन उडान गर्ने नसक्ने जनाएको छ ।
विराटनगरसँगै तुम्लिङटारमा पनि मौसम खराबका कारण उडान नभएको बुद्ध एयरलाइन्सका रूपेश जोसीले बताए ।

विराटनगरमा सबैभन्दा बढी दैनिक ६ वटा उडान गर्ने बुद्ध एयरलाइन्स हो । त्यसबाहेक अहिले विराटनगरमा सौर्य र यतीले उडान गर्दै आएको छ । अन्य स्थानमा भने मौसम अनुकूल हरेर उडान गरिरहेको बुद्ध एयरलाइन्सको भनाइ छ । यती एयरलाइन्सले पनि मंगलबारसम्मको विराटनगर उडान बन्द गर्ने निर्णय गरेको छ । उडान अवरोधका कारण यतीले पनि टिकट सार्ने र रद्द गर्नेलाई रकम फिर्ता गरिरहेको छ ।

यती एयरलाइन्सका बजार व्यवस्थापक प्रमुख भीमराज राईले अन्य विमानस्थलमा भने मौसम अनुकूल हरेर उडान भइरको बताए । तर, अन्य विमानस्थलमा पनि पूर्णरूपमा जहाज उड्न भने सकेका छैन ।

यस्तो छ समस्या प्रवक्ता ठाकुरका अनुसार भैरहवा विमानस्थल अहिलेसम्म समस्या आएको छैन । तर, मौसम प्रतिकूलतका कारण कतिबेला उडान रद्द हुने वा डिले हुने भन्ने यकिन छैन । मौसम अनुकूल भएको अवस्थामा उडान भइरहेको छ । यस्तै नेपालगन्ज विमानस्थलमा पनि उडान भइरहेको छ । मौसम प्रतिकूलताका कारण जहाज उडने समयमा भने केही तलमाथि छ । धनगढी विमानस्थलमा अहिलेसम्म खासै समस्या नभए पनि पूर्णरूपमा भने उडान भएको छैन । यसैगरी धनुषाको जनकपुर विमानस्थलको पार्किङमा पानी जमे पनि रन वेबाटै यात्रु ओसारपसार गरेर भए पनि उडान सुचारु गरेको ठाकुरले जानकारी दिए ।

सिमरामा शनिबार समस्या देखिए पनि आइतबार उडान भएको विमानस्थल कार्यालयले जनाएको छ । लुक्ला विमानस्थलमा भने शुक्रबारदेखि नै उडान हुन सकेको छैन । लुक्ला विमानस्थलमा प्रायः यो समय मौसम प्रतिकूलताका कारण उडानमा असज हुने समय नै हो । मौसम अनुकूल भएको अवस्थामा एक÷दुई उडान हुने भए पनि अहिले हुन नसकेको ठाकुले जानकारी दिए । चितवनको भरतपुर विमानस्थलमा पनि उडान हुन सकेको छैन । मौसम अनुकूल भएको अवस्थाका केही उडान भइरहेको विमानस्थल कार्यालयको भनाइ छ । अन्य दिनमा जस्तै उडान हुन मनसुन सक्रिया हुँदा सम्भव नभएको ठाकुरको भनाइ छ ।