छिमेकी भागिसक्दा पनि हतारो नगर्दा

इटहरी : ‘बाढी आएको थाहा थियो तर डिलबाट उक्लिँदैन होला भनेर वास्ता गरेनौं, घरमै सुत्यौं', इटहरी-४ स्थित गैरीगाउँकी १५ वर्षीया कमला राईले भनिन्, ‘पछि सानी (सानिमा)ले उठाउँदा पानी कम्मर-कम्मर आइसकेको रहेछ, भाग्न खोज्दा सकेनौं र सिलिङ समातेर बस्यौं ।'

कमला, उनका बुबाआमा र भाइहरू बूढी खोला किनारको उक्त गाउँमा १० वर्षयता बस्दै आएका थिए । यसबीचमा बूढी खोलाको बाढी यसपटकजस्तो उर्लिएको थिएन । खोला बाढी आए पनि डिल नाघ्दैनथ्यो । त्यसैले पनि छिमेकी भागिसक्दा पनि उनीहरूले त्यहाँबाट हिँड्न हतारो गरेनन् ।

बाढी झन्डै घरको छानोसम्मै पुग्यो । गारो भत्कायो । बाढी बढ्न थालेपछि उनीहरू आत्तिए । हारगुहार मागे । यही साउन २७ गते मध्यरातको त्यो भेलमा उनीहरूलाई सहयोग गर्ने कोही भएन । ‘नजिकै एउटा रूख भेटें र त्यसमा चढें, भाइ अर्को रूखमा चढ्यो', कमलाले भनिन्, ‘त्यो रूख भाँचिएपछि अर्कोमा अनि त्यो पनि भाँचिएपछि फेरि अर्कोमा चढेर बसें ।'

पानी झमझम परिरहेको रातमा पानीको आवाजबाहेक केही सुनिँदैनथ्यो । सोलार-बत्ती बालेका केही घरबाट उज्यालो आएको थियो तर त्यो पनि पानीले क्षणभरमै निभाइदियो । उनीहरू रूखमाथि चढेर चिच्याए । मुख्य चोकनजिकको इटहरीसमेत टेंग्रा खोलाको बाढीमा डुबिरहेको बेला बूढी खोला किनारको भेलमा फसेकाहरूबारे धेरैले थाहा पाएनन् । डिलमा घर भएकाहरूले थाहा पाए पनि केही गर्न सक्ने अवस्था थिएन ।

-तीन जना बाढीमा बेपत्ता
-दुई जनाको रूखबाट उद्धार
-एक महिला पौडेर बाँचिन

‘सानीलाई हेर्दाहेर्दै बाढीले बगायो', सानिमा सानुमायासँगै अस्पतालमा भेटिएकी उनले भावुक हुँदै भनिन्, ‘भाइ, आमा र बाबाको अहिलेसम्म पत्तो छैन ।' सानुमायाले इटहरी-५ की सीतासन्ध्या राईसँग बाढीले बगाउनुअघि फोन गरेर सहयोग मागेकी रहेछन् । ‘सानुमायाले फोन गरेको गर्‍यै गरेपछि मैले चिनेजानेकाहरूलाई फोन गरें तर सबै तर्किए', सीतासन्ध्याले भनिन्, ‘प्रहरीलाई फोन गरें तर निकै ढिलो मात्र त्यहाँ पुग्यो रे !'

बाढी कम भएपछि कमला र उनका भाइ निसानलाई रूखबाटै उद्धार गरिएको थियो । सानुमायालाई बिहान दुहबीमा भेटिएको थियो । उनी तीन घन्टा पानीमा संघर्ष गरेर किनारमा उक्लिएर बाँचेकी हुन् । उनलाई झन्डै १० किलोमिटर बाढीले बगाएको थियो । ‘सानुमाया शुक्रबार सधैं दिदीकहाँ जान्थिन्, शनिबार फर्किन्थिन् । उनको दिन बलियो रहेछ', सीतासन्ध्याले भनिन् ।

तीन जनाको ज्यान जोगिए पनि आमाबुवा आशादेवी र राजकुमार अनि कान्छो भाइ निमेश बेपत्ता छन् ।

‘भेलसँग संघर्ष गरिरहें'

सानुमाया, बाढीपीडित
घरमा हामी ६ जना थियौं, सबै सुतिरहेका थियौं । अचानक बाढी आयो । बाहिर भाग्न खोजेको सकेनौं । घरभित्रै बस्यौं । बाढीले वरपरका धेरै घर लडायो । हाम्रो घरको पनि गारो भत्कायो । पानी माथि-माथिसम्म आइपुगेको थियो । हामी घरको छानामुनि झुन्डिरहेका थियौं । पानी भरिएर सास फेर्न गाह्रो भएपछि त्यहाँबाट निस्कियौं ।

मैले एउटा रूख भेटें । दिदीको ठूलो छोरी अर्को रूखमा चढेर कराउँदै थियो । दिदी र म एउटा रूख भेटेर बसेका थियौं । मैले आमालाई फोन लगाएँ । बोल्दा-बोल्दै मलाई भेलले बगायो । डुब्नबाट बच्न पौडी खेल्दै गएँ । भेलले घरि सुनामीजस्तो आएर तल घुम्दै-घुम्दै लान्थ्यो । म बल गरेर माथि निस्कन्थें । झन्डै तीन घन्टा यस्तै भइरह्यो ।

बीच-बीचमा ठूला मुढाहरू ठोक्किन आउँथे । कतिले काट्यो, बाढीले बगाएर ल्याएको कति वस्तुले छाती, टाउकोमा हान्थ्यो । भेलले मलाई साढे ३ बजेतिर दुहबी पुर्‍याएछ । किनारतिर निस्कने प्रयासमा केही रूखको बीचमा फोहोर थुप्रिएको थियो । त्यहाँ बल गरेर समातें । एकछिन त्यसै पानीमा बसें । त्यत्तिकैमा एउटा खाट उत्तानो परेर मेरो छातीमा ठोक्कियो । त्यसमै चढेर रूखको हाँगो समातें । खाटलाई पनि खुट्टाले ठेल्दै किनारतिर लगें । ठूलो काठ आएर मैले समातेको रूख भाँच्थ्यो । फेरि अर्को रूख समात्थें । यसरी नै बल्लतल्ल एउटा रूख समातेर त्यसमै बल गरेर चढें ।

यताउता हेर्दा कोही थिएन । लुगा पनि च्यातिइसकेको थियो । त्यत्तिकैमा केही मानिस आइरहेको आवाज सुनें । दाउरा खोज्न आएका मानिस होलान् । उनीहरू बत्ती बाल्दै दाउरा खोज्दै थिए । सुन्लान् भनेर बल गरेर कराएँ । उनीहरू दौडँदै आए । म निकै गलिसकेको थिएँ । उनीहरूले झारेर घिसार्दै भए पनि त्यहाँबाट एउटा घरमा पुर्‍याए । त्यत्तिकैमा म बेहोस भएँ ।

होसमा आउँदा हातखुट्टा तताउँदै रहेछन् । बालुवा खाएर सास फेर्न अप्ठ्यारो भएको थियो । उतैको हस्पिटलमा सामान्य उपचार भयो । केही समयपछि प्रहरीहरू आए ।

राहत वितरणमा एकद्वार

इटहरी : इटहरीका मेयर द्वारिकलाल चौधरीले बाढीका कारण इटहरीमा ६ सयभन्दा बढी परिवारका तीन हजार व्यक्ति विस्थापित भएको जानकारी दिएका छन् । विस्थापितहरू मन्दिर, विद्यालय तथा अरूको घरमा शरण लिएर बसेका छन् । कतिपयले आफन्त र छिमेकीको घरमा आ श्रय लिएका छन् । उनीहरूलाई स्थानीय क्लब, सामाजिक संघसंस्था तथा व्यक्तिले खाना तथा लत्ताकपडा वितरण गरेका छन् ।

बाढीपीडितका लागि ओढ्ने, ओच्छ्याउने तथा खानेकुराको अभाव देखिएको छ । मेयर चौधरीका अनुसार राहत वितरणमा एकद्वार प्रणाली अपनाइएको छ । इटहरी उपमहानगरपालिकाका कार्यकारी अधिकृत र आफ्नो संयुक्त हस्ताक्षरमा सोमबार बैंक खाता खोल्ने र त्यही जम्मा हुने रकमबाट राहत वितरण गरिने उनले जानकारी दिए । त्रिशक्ति टेक्निकल स्कुलले ५० हजार र सांसद रेवतीरमण भण्डारीले २१ हजार रुपैयाँ दिने घोषणा गरेका छन् ।