काठमाडौं: एनआईसी एसिया बैंकले आफ्ना सेयरधनीलाई चुक्ता पुँजीको २१.०५ प्रतिशत लाभांश दिने भएको छ।
बैंकको सञ्चालक समितिको बैठकले आर्थिक वर्ष २०७३/७४ का लागि नेपाल राष्ट्र बैंक तथा बैंकको २०औं वार्षिक साधारणसभाको स्वीकृतिपश्चात आफ्ना सेयरधनीलाई चुक्ता पुँजीको २१.०५ प्रतिशत लाभांश (२० प्रतिशत बोनस सेयर र कर प्रयोजनार्थ १.०५ प्रतिशत नगद लाभांश) वितरण गर्ने निर्णय गरेको हो ।
गत आवमा बैंकले एक अर्ब ४७ करोड ३४ लाख ६५ हजार रुपैयाँ खुद मुनाफा गरेको थियो । हालसम्म बैंकले देशभरि एक सय १९ शाखा तथा चार एक्स्टेन्सन काउन्टरबाट सेवा प्रदान गरिरहेको छ । बैंकका निक्षेप ग्राहक संख्या पाँच लाख ५० हजारभन्दा बढी रहेको र बैंकका कर्जा ग्राहक संख्या २५ हजारभन्दा बढी रहेको बैंकले जनाएको छ ।
बैंकका डिजिटल बैंकिङ सेवा लिने सेवाग्राही संख्या दुई लाख ५० हजार नाघेको छ । बैंकले तीन वर्षअघि नै दीर्घकालीन रणनीति तर्जुमा गरेको र उक्त रणनीति कार्यान्वयनपश्चात सन २०२० सम्म बैंकका शाखा सञ्जाल तीन सय र एटीएम संख्या एक हजार पुर्याई राष्ट्रकै उत्कृष्ट बैंकभित्र पर्ने लक्ष्य लिएको जनाएको छ ।
प्रतिक्रिया दिनुहोस !
