बानेश्वरमा डा. केसीका समर्थकमाथि प्रहरी हस्तक्षेप
काठमाडौं : असनरत डा. गोविन्द केसीका समर्थकले चिकित्सा शिक्षा विधेयक संसदबाट पास गर्न ढिलाइ भएको भन्दै व्यवस्थापिका संसद् भवन नयाँ बानेश्वर नजिक निषेधित क्षेत्रमा प्रदर्शन गरेका छन् ।
केसीको जीवन जोखिममा पर्दा पनि सरकारले माग पूरा नगरेको भन्दै समर्थकहरु प्रदर्शनमा उत्रिएका हुन् । निषेधित क्षेत्र तोड्ने क्रममा प्रहरी र केसीका समर्थकहरु बीच झडपसमेत भएको छ । करीब एक सयको संख्यामा रहेका केसीका समर्थकले ‘संसदको तलव भत्ता बढाउने ऐन एकै दिन, चिकित्सा शिक्षा विधेयक पास गर्न बर्षाे दिन’ भन्ने नारा र प्लेड कार्ड बोकेर प्रर्दशन गरिरहेका छन् । प्रहरीको हस्तक्षेपविरुद्ध पनि उनीहरुले नाराबाजी गरिरहेका छन्।
डा. केसीका समर्थकले बानेश्वर क्षेत्रमा केही दिनयता प्रर्दशन जारी राखेका छन् । यता केसीको समर्थनमा नेपाल चिकित्सक संघ सरकारी चिकित्संक संघ लगायतको आह्वानमा मुलुकभरका अस्पतालको आकस्मिक बाहेकका सेवा ठप्प छन् ।
डा. गोविन्द केसीको ११ औ अनसन २३ औँ दिनमा प्रवेश गरेको छ । उनी अझ पनि माग सम्बोधन नभएको भन्दै अनसन तोड्ने मनस्थितिमा देखिन्नन् । सिंगो चिकित्सा शिक्षा र स्वास्थ्य क्षेत्रका अनियमितता र सुविधाहरुको चरम केन्द्रीकरणको अन्त्य गर्न उचित कानुन बन्नुपर्ने भन्दै उनीे ११ औं अनसन बसेका हुन् । केसीको ११ औं अनसन अहिलेसम्मै लामो बन्न पुगेको छ ।
माग सम्बोधन गर्न भन्दै सरकारसँग ६ पटक वार्ता भएपनि अझैसम्म सहमति हुन सकिरहेको छैन । स्वास्थ्य मन्त्री गिरिराजमणी पोखरेलले केसीको अनसन २० दिन मात्रै पुग्दा माग पूरा हुने हुँदा अनसन तोड्न आग्रह गरेका थिए ।
प्रतिक्रिया दिनुहोस !
