काठमाडौं : बाढीपहिरोका कारण देशमा प्रमुख राजमार्गमा अवरुद्ध हुँदा हवाई यात्रुको चाप बढेको छ । यात्रु चापका कारण सुगमका लागि पनि जहाजको टिकट पाउन कठिन भएको छ ।
सडकभन्दा सुरक्षित र भरपर्दो मानिने हवाई यात्रा टिकट अभावकै कारण कठिन बन्दै गएको छ । तराईमा शनिबारदेखि आएको बाढी र पहाडी जिल्लामा आएको पहिरोले अधिकांश सडक सञ्चालन हुन सकेका छैनन् । देशकै लाइफ लाइन मानिने पूर्वपश्चिम राजमार्गअन्तर्गतको मुग्लिङ-नारायणगढ सकडखण्ड पनि पहिरोका कारण दैनिकजसो बन्द हुने गरेको छ ।
यसकारण हवाई यात्रा गर्नेको संख्या बढिरहेको छ । सडकको यात्रा निश्चित नभएपछि उपत्यकाबाहिर जाने यात्रुको रोजाइमा हवाई यात्रा परेको छ । तर हवाई यात्राका लागि अहिले अफ सिजन हो । अफ सिजन भए पनि जहाज भरिभराउ नै उडिरहेका छन् । अन्य वर्षको तुलनामा अहिले अफ सिजनमा पनि हवाई यात्रा गर्नेको संख्या बढी रहेको व्यवसायी बताउँछन् ।
विशेषगरी भैरहवा, पोखरा, भरतपुर, नेपालगन्ज, विराटनगर र भद्रपुर जाने हवाई यात्रुको चाप बढ्दो छ । अविरल वर्षाकै कारण विराटनगर विमानस्थल सञ्चालनमा आउन नसके पनि सोमबारबाटै अन्य सबै विमानस्थल भने सञ्चालनमा आइसकेका छन् । विमानस्थल सञ्चालनमा आए पनि यात्रुले सहजै टिकट पाउन सक्ने अवस्था छैन ।
कतिपय एयरलाइन्स कम्पनीले यात्रु चाप बढेपछि पोखरा, भरतपुर, नेपालगन्ज र भैरहवाको उडान बढाइसकेका छन् । अहिले आन्तरिकतर्फ एक दर्जनभन्दा बढी एयरलाइन्स कम्पनीका ४० भन्दा बढी जहाजले सेवा दिइरहेका छन् ।
महिनैपिच्छे एक वा दुई नयाँ ठूला जहाज थपिएका छन् । तर यात्रुले सहज रूपमा टिकट भने पाउन सकेका छैनन् । आन्तरिक उडानमा धेरै जहाज थपिएपछि सस्तो र सहज यात्रा गर्न पाउने हवाई यात्रुको आशा पनि साकार हुन सकेको छैन ।
यात्रु चापका कारण सुगमका लागि पनि जहाजको टिकट पाउन कठिन भएको छ ।
पछिल्लो समय बाढी र सडकमा देखिएको समस्याका कारण ८० प्रतिशतको हाराहारीका रहेको अकुपेन्सी अहिले शतप्रतिशत पुगेको सिम्रिक एयरलाइन्सका बजार व्यवस्थापक प्रज्वल थापा बताउँछन् । ‘शुक्रबारसम्म जहाज उड्नै लाग्दा पनि यात्रुले टिकट पाउने अवस्था थियो', उनले भने, ‘आइतबारदेखि भने दुई दिनअगाडि नै जहाजको टिकट फुल भएको छ ।'
अफ सिजनमा पनि यात्रुले टिकट पाउन मुस्किल हुनुको प्रमुख कारण तराईमा आएको बाढी र सडकमा देखिएको समस्या रहेको उनको भनाइ छ । यात्रु चाप बढेपछि सिम्रिक एयरलाइन्सले दुई र कहिलेकाहीँ तीनवटासम्म उडान गर्दै आएको पोखरामा अहिले चारवटासम्म उडान गरे पनि जहाज भरिभराउ नै रहेको थापाले बताए । सिम्रिकले अहिले पोखरा, भरतपुर र भैरहवामा नियमित उडान गर्दै आएको छ ।
सडक सञ्चालनमा देखिएको समस्याका कारण अहिले टिकट सहजै पाउने अवस्था नरहेको सौर्य एयरलाइन्सका बजार व्यवस्थापक मुकेश खनालले बताए । यात्रा गर्ने एक-दुई दिनअगावै टिकट लिनुपर्ने अवस्था रहेको उनको भनाइ छ । ६० प्रतिशतभन्दा बढी बजार हिस्सा ओगट्न सफल बुद्ध एयरलाइन्सले पनि टिकटमा अहिले केही चाप बढेको जनाएको छ ।
सडक यात्रा कष्टकर बन्दै गएका कारण पनि हवाई यात्रा गर्नेको संख्या बढेको एयरलाइन्सका रूपेश जोशी बताउँछन् । अन्य वर्षमा यो समयलाई अफ सिजन भन्ने गरिए पनि अहिले त्यस्तो नरहेको उनले बताए । टिकट आजका लागि आजै पाउने अवस्था छैन । यती एयरलाइन्सले पनि सडक समस्याका कारण एक सातादेखि हवाई यात्रु ह्वात्तै बढेको र टिकटमा केही समस्या सिर्जना भएको जनाएको छ ।
प्रतिक्रिया दिनुहोस !
