रियल म्याड्रिडका प्रशिक्षक जिदानको छलाङ
म्याड्रिड : फ्रान्सका पूर्वखेलाडी जिनेदिन जिदानले रियल म्याड्रिडको प्रशिक्षकको जिम्मेवारी सम्हालेको दुई वर्ष पनि पुगेको छैन । यद्यपि उनी छोटो अवधिमै क्लबको सर्वाधिक सफल प्रशिक्षकको सूचीमा अघि देखिएका छन् । सन् १९१० यता रियल म्याड्रिडको ६२औं प्रशिक्षकका रूपमा नियुक्त भएका जिदान आफ्नो झन्डै १९ महिनाको अवधिमा क्लबको सर्वाधिक सफल प्रशिक्षकको सूचीको चौथो स्थानमा छन् ।
गत मंगलबार यूईएफए सुपर कपको फाइनलमा म्यानचेस्टर युनाइटेडलाई २–१ गोलले पराजित गर्दा जिदानले रियलको प्रशिक्षकको हैसियतमा छैटौं उपाधि हात पारेका थिए । सोही उपाधिपछि उनी रियलको सर्वाधिक सफल प्रशिक्षकहरूको सूचीको चौथो स्थानमा उक्लिएका हुन् । टोलीको निरन्तरको खराब प्रदर्शनसँगै क्लबले तत्कालीन प्रशिक्षक राफा बेनेटिजलाई हटाउँदै सन् २०१६ को जनवरीमा जिदानलाई जिम्मेवारी सुम्पिएको थियो ।
प्रशिक्षक नियुक्त भएको चार महिनाभित्रै उनले टोलीलाई च्याम्पियन्स लिगको उपाधि दिलाएका थिए । त्यससँगै खेलाडीको रूपमा समेत रियललाई उपाधि जित्न योगदान पुर्याएका जिदानले प्रशिक्षकका रूपमा पनि आफू उत्कृष्ट रहेको प्रमाणित गरे । गत सिजन प्रशिक्षकको रूपमा पूरा सिजन बिताएका जिदानले चिरप्रतिद्वन्द्वी बार्सिलोनालाई पछि पार्दै ला लिगाको उपाधि दिलाए भने च्याम्पियन्स लिग उपाधिको पनि रक्षा गर्न सफल भए । त्यससँगै रियलले क्लब विश्वकपको उपाधिसमेत जितेको थियो ।
गत सिजन कार्डिफमा भएको च्याम्पियन्स लिगको फाइनलमा रियलले युभेन्टसलाई पराजित गर्दा जिदानले प्रशिक्षकको हैसियतमा क्लबको छैटौं उपाधिसहित सिजनको अन्त्य गरेका थिए । मेसेडोनियामा यूईएफए सुपर कपको उपाधि जितेपछि जिदान रियलका सर्वाधिक सफल प्रशिक्षकको सूचीमा भिसेन्ट डेल बोस्कभन्दा केवल एक उपाधिले पछि परेका छन् ।
डेल बोस्कले रियललाई सात उपाधि दिलाएका थिए, जसमा च्याम्पियन्स लिग र स्पेनिस लिगको दुई÷दुई तथा युरोपियन सुपर कप, इन्टर कन्टिनेन्टल कप र स्पेनिस सुपर कपको एक÷एक उपाधि छन् । जिदानले भने रियललाई च्याम्पियन्स लिग र युरोपियन सुपर कपको दुई÷दुई तथा स्पेनिस लिग र क्लब विश्वकपको एक÷एक उपाधि जिताएका छन् ।
रियलका लागि उपाधिको हिसाबले सर्वाधिक सफल प्रशिक्षक भने मिगुइल मुनोज हुन् । उनले रियललाई १४ उपाधि दिलाएका थिए, जसमा स्पेनिस लिगको मात्रै नौ उपाधि समावेश छन् । दोस्रो स्थानमा लुइस मलोउनी छन् । उनले आठ उपाधि दिलाएका थिए, जसमा घरेलु लिगको पनि तीन उपाधि समावेश छ ।
नयाँ सिजन सुरु हुनै लाग्दा जिदानसामु कम्तीमा यो सूचीको दोस्रो स्थानसम्म पुग्न सक्ने सम्भावना रहेको छ । यो सिजन तीन उपाधि थप्न सकेमा जिदान रियलका सर्वाधिक सफल प्रशिक्षकको सूचीको दोस्रो स्थानमा उक्लने छन् । मात्र एक उपाधि जितेको अवस्थामा डेल बोस्कसहित संयुक्त रूपमा तेस्रो तथा दुई उपाधि जित्न सकेको अवस्थामा मलोउनीसँगै संयुक्त रूपमा तेस्रो स्थानमा रहनेछन् । यो सूचीमा शीर्ष स्थान लिनका लागि भने जिदानले लामै समय कुर्नुपर्ने देखिन्छ ।
रियलका सर्वाधिक सफल प्रशिक्षक :
(१) मिगुइल मुनोज : १४ उपाधि (स्पेनिस लिग नौ, युरोपियन कप दुई, कोपा डेल रे दुई र इन्टर कन्टिनेन्टल एक ।)
(२) लुइस मलोउनी : ८ उपाधि (स्पेनिस लिग तीन, यूईएफए कप दुई, किङ्स कप दुई र लिग कप एक ।)
(३) भिसेन्टे डेल बोस्क : ७ उपाधि (च्याम्पियन्स लिग दुई, स्पेनिस लिग दुई, युरोपियन सुपर कप एक र स्पानिस सुपर कप एक ।)
(४) जिनेदिन जिदान : ६ उपाधि (च्याम्पियन्स लिग दुई, युरोपियन सुपर कप दुई, स्पेनिस लिग एक र क्लब विश्वकप एक ।)
प्रतिक्रिया दिनुहोस !
