मौसममा सुधारसँगै खुले सडक

तुल्सीपुर : दाङमा चार दिनपछि सडक यातायात सुचारु भएको छ । बाढीपहिरोका कारण अवरुद्ध सडक मौसममा सुधारसँगै मंगलबारदेखि सञ्चालनमा आएका हुन् । जिल्ला जोड्ने सबै सडक बाढीपहिरोका कारण अवरुद्ध थिए । अविरल वर्षापछिको बाढीका कारण नाकाबन्दीजस्तै अवस्था देखिएकोमा चार दिनपछि केही सहज भएको छ । यससँगै अलपत्र परेका यात्रु तथा सवारी साधन गन्तव्यतर्फ लागेका छन् ।

राप्ती लोकमार्गअन्तर्गत अमिलिया-तुल्सीपुर, दाङ-सुर्खेत राजमार्ग, पूर्व-पश्चिम राजमार्ग, लमही-घोराही-तुल्सीपुर सडकखण्ड, तुल्सीपुर-पुरन्धारा सडक, तुल्सीपुर-सल्यान सडक मर्मतपछि सञ्चालनमा आएको सडक डिभिजन कार्यालय दाङका प्रमुख बद्रीप्रसाद शर्माले जानकारी दिए । मंगलबारदेखि कुनै सडकखण्ड पूरै र कुनै एकतर्फी रूपमा सञ्चालनमा आएको शर्माले बताए ।

उनका अनुसार अमिलिया-तुल्सीपुर र तुल्सीपुर-लमही सडकखण्ड सुचारु गराउन बढी कठिनाइ झेल्नुपरेको थियो । अमिलिया-तुल्सीपुर सडकको २० किलोमिटर खण्डमा सयभन्दा बढी स्थानमा पहिरो खसेको र नौ स्थानमा भासिएको उनले सुनाए । ‘यो सडकखण्डमा एकतर्फी रूपमा यातायातका साधन सञ्चालनमा ल्याएका छौं', उनले भने, ‘निरन्तर मर्मत भइरहेको छ, सडकमा पहिरो नखसेको र ढुंगा नझरेको त ठाउँ नै भेटिँदैन ।'

चारजनाको मृत्यु

दाङमा बाढीमा परी चारजनाको ज्यान गएको छ । दुई जना घाइते भएका छन् । एक सय ६४ घर डुबानमा परेका छन् । ८८ घर बाढीले बगाएको छ । ६ सय १४ घरपरिवार विस्थापित भएको जिल्ला आपत्कालीन कार्यसञ्चालन केन्द्रका सूचना व्यवस्थापन अधिकृत खिलानाथ दाहालले जानकारी दिए । बाढीले बगाउँदा तुल्सीपुर उपमहानगरपालिका-१३ की भगवती सुनार, वडा नम्बर ४ का नरबहादुर रावत, घोराही-१२ का निर्मला बाढा, तुल्सीपुर-११ का मेघबहादुर केसीको ज्यान गएको हो ।