काठमाडौं : कृष्णजन्माष्टमीको अवसरमा जानकी जीवनकुञ्ज पशुपतिमा नन्दोत्सव मनाइएको छ । कृष्णको जन्म भइसकेपछि भोलिपल्ट नन्दको घरमा आएको खुसीयालीलाई सम्झँदै नन्दोत्सव मनाउने गरिन्छ ।
साउन र भदौ दुई महिनासम्म कृष्णझुला कार्यक्रम आयोजना भइरहेको कुञ्जमा देशैभरिबाट भक्तजन आउने गर्छन् । ७० वर्षभन्दा अघिदेखि कुञ्जमा कृष्णझुला कार्यक्रम आयोजना भइरहेको छ । वर्षा ऋतुभरि झुला मनाउने गरिन्छ । वर्षा ऋतुको प्रतीक हरियाली भएकाले भक्तहरूले हरियो वस्त्र, हरियै टीका लगाएर प्रकृतिसँग प्रेम साट्ने गर्छन् । कृष्णले दिएको सन्देशमध्ये एक प्रकृति प्रेम पनि हो ।
उनले गोवद्र्धनको पूजा गरेर प्रकृतिको पूजा गर्न सिकाए । प्रकृतिको उपभोगभन्दा पनि उपयोग गर्न सिकाएका थिए । कृष्ण राजनीतिज्ञ, किसान, द्रोही सबैको आफ्ना हुन् । कुञ्जका अध्यक्ष अजितप्रसाद गौतम कृष्णको अवतारलाई अनुकरणीयभन्दा पनि भजनीय ठान्छन् । कृष्णको लीलालाई लैंगिक सम्बन्धको विषयमा चर्चा गरिन्छ । गौतम यसलाई गलत व्याख्या भन्छन् ।
उनको व्याख्याअनुसार कृष्ण पूर्ण आनन्द हो, समष्टि हो, जीवात्मा भनेको वेष्टि हो, वेष्टिले सधंै समष्टि खोज्छ । त्यही मिलनलाई रासलीला हो । रमणीय वर्षा यामभरि आत्मिक अनुष्ठानमा बसेर झुल्ने र आनन्द लिने भक्तहरूकै भेटीबाट कार्यक्रम सञ्चालन हुन्छ । हरियो कपडाहरूले सजाइएको कुञ्जको हलभित्र झोलुंगोमा हरियो रिबन लगाएर कृष्णलाई झुलाउने गरिन्छ ।
साउन १४ गते सखी मण्डलले विशेष झुला आयोजना गरेको थियो । भदौ २४ गते सखा मण्डलले विशेष झुला आयोजना गर्छ । वर्षैपिच्छे भक्तहरूको चाप बढिरहेको जानकारी गौतमले दिए । नेपालभरि रहेका कुञ्जका शाखाहरूमा पनि कृष्णजन्माष्टमी विशेष रूपमा मनाइने गरिन्छ ।
प्रतिक्रिया दिनुहोस !
