काठमाडौं : नेपाल टेलिकमले देशका विभिन्न स्थानमा बाढीपहिरोबाट पीडितको उद्धार तथा राहतका लागि आवश्यक सहयोग पु¥याउन २०७४ साउन २९ देखि ३१ गतेसम्म आफ्नो नेटवर्कभित्र निःशुल्क एसएमएस पठाउन सकिने व्यवस्था गरेको थियो । यस अवधिमा करिब एक करोड १२ लाख निःशुल्क एसएमएस आदानप्रदान भएको पाइएको टेलिकमले जनाएको छ ।
टेलिकमका अनुसार साउन २९ गते १७ लाख ३० हजार, ३० गते ४७ लाख ५५ हजार र ३१ गते ४७ लाख १५ हजार एसएमएस आदानप्रदान भएको छ । देशका विभिन्न भागमा बाढीपहिरोबाट जनता पीडित भइरहेको अवस्थामा राहत कार्यमा सहयोग पुगोस् तथा पीडितलाई आफन्तसँग सम्पर्क गर्न सहज होस् भन्ने उद्देश्यले कम्पनीले उक्त सेवा सञ्चालनमा ल्याएको थियो ।
कम्पनीको नेटवर्क प्रयोग गरी जल तथा मौसम विज्ञान विभागले विपद्को अवधिमा प्रभावित क्षेत्रका बासिन्दालाई चार लाख ८६ हजारभन्दा बढी विपद् आउनुपूर्वको जानकारी (एलर्ट एसएमएस) पठाएको छ ।
विभागले साउन २० गते ९४ हजार ६ सय, २९ गते चार सय, ३० गते एक लाख ६ हजार दुई सय, ३१ गते ७८ हजार आठ सय र ३२ गते दुई लाख ६ हजार पाँच सयभन्दा बढी एसएमएस पठाएको बताएको छ । जल तथा मौसम विज्ञान विभागले आवश्यकताअनुसारको संख्यामा आफै एसएमएस पठाउन सक्ने गरी व्यवस्था मिलाएको थियो ।
प्रतिक्रिया दिनुहोस !
