सरकारी जागिरे भए पनि मोडलिङमा आफ्नै पहिचान बनाएकी छन् गीता राईले । पछिल्लो समय म्युजिक भिडियोमा रुचाइएकी गीताले हालसम्म दुई सयभन्दा बढी भिडियोमा मोडलिङ गरिसकेको बताइन् । उनले मोडलिङ गरेको तीतेकरेलीले, उनकै सम्झनामा, पछ्यौरी लेऊ बैना, झिमझिम सानु, चाहियो जागिर, निष्ठुरी मायालु, छाडी जाने निष्ठुरीजस्ता गीतलाई श्रोतादर्शकले निकै रुचाएका छन् । गीताले लोकदोहोरीमा मात्र मोडलिङ गरेकी छैनन्; कौडा, सालैज्यो, झ्याउरे, नेवारी, सेलोलगायत विभिन्न जातजाति, भाषाभाषीका मौलिक गीतहरूमा समेत काम गरेकी छन् ।
बाबु सुनिल राई र आमा कुमारी राईको छोरीका रूपमा २०३६ सालमा राजधानीमा जन्मेकी उनी सानैदेखि कला क्षेत्रमा रुचि राख्थिन् । गीतसंगीत मन पराउने उनी नृत्यमा अगाध रुचि राख्थिन् । उनी नेपाल प्रहरीमा सरकारी जागिरे बन्न पुगिन् । उनलाई जागिर पनि निकै फलदायी बन्यो । राजधानीस्थित पुलिस क्लबको सांस्कृतिक विभागमा कार्यरत गीतालाई नेपाल प्रहरीको जागिरले उनको नृत्यप्रतिको रुचि र चाहनालाई फल्नेफुल्ने मौका दियो ।
नृत्य प्रस्तुतिका सिलसिलामा हङकङ, जापान, बेल्जियम, अस्ट्रेलिया, क्यानडा, सिंगापुरलगायत विभिन्न देशमा पुगिसकेकी गीता भन्छिन्, 'समाजअनुसार चल्नुपर्छ । समाजले नै स्वीकार्न सकेन भने त्यो कला र कलाकारिताको कुनै अर्थ हुँदैन ।' आफूलाई भद्दा रूपमा भन्दा सभ्य तरिकाले प्रस्तुत गर्नुपर्छ भन्ने मान्यता राख्ने गीताको अनुभवमा समाजले कलाकारबाट धेरै सिको गर्छन् । त्यसैले कलाकार सभ्य र शालीन हुनु जरुरी छ । गीत, संगीत तथा नृत्यकला मौलिकता झल्कने खाले हुनुपर्छ । अन्य देशका कला सिको गरी विकृति भित्र्याउने काम छोटो समयमै चर्चा कमाउने मान्छेले गर्ने गरेको उनको आरोप छ ।
गीताले विभिन्न अवार्ड तथा पुरस्कार पनि हात पारेकी छन् । हालै सम्पन्न 'छैटौं म्युजिक खबर म्युजिक अवार्ड-२०७४'को लोकदोहोरी महिला मोडल तर्फबाट उनले अवार्ड चुम्न सफल भएकी थिइन् । कार्यक्रममा गीतासँगै मोडल पार्वती राई, पूर्णिमा श्रेष्ठ लगायतका पाँचजना मनोनयनमा परेका थिए । पाँचबाट गीता 'निष्ठुरी मायालु' बोलको गीतबाट यस वर्षको सर्वोत्कृष्ट मोडलको अवार्ड उचाल्न सफल भएकी हुन् ।
प्रतिक्रिया दिनुहोस !
