काठमाडौंः बाढी प्रभावित विभिन्न जिल्लाको स्थलगत निरीक्षणका क्रममा भौतिक पूर्वाधार तथा यातायात मन्त्री वीरबहादुर बलायर यति बेला पूर्वी तराई पुगेका छन्।
बिहिबार हेटौडाबाट निरीक्षण सुरु गरेका मन्त्री बलायरले शुक्रबार बारा, रौतहट, सर्लाही र महोत्तरीका बाढी प्रभावित बिभिन्न क्षेत्रको स्थलगत अनुगमन गरेका छन्। उनले बाढीले क्षति पुर्याएका पूर्वपश्चिम राजमार्ग, पुल, हुलाकी राजमार्गका साथै भित्री गाउँ जोड्ने सडकको पनि निरीक्षण गरेको मन्त्रीका स्वकीय सचिव केशव बलायरले बताए।
बाढीले सडक क्षेत्रमा ठूलो क्षति पुर्याएको भन्दै मन्त्री बलायरले यथासक्य चाँडो सडक सञ्जाललाई पुरानै स्थितिमा पुर्याउन मातहतका अधिकारीलाई निर्देशन दिएका छन्। उनले राजमार्ग लगायत सडक क्षतविक्षत हुँदा सहज यातायातमा समस्या भएको बताए।
महोत्तरीमा रातु पुलको एक छेउ बाढीले बगाउँदा सवारी आवत जावतमा समस्या भएको छ। यसै गरी सर्लाहीमा पनि बाढीले सडक र पुलमा क्षति पुर्याउदा सवारी आवत जावतमा समस्या उत्पन्न भएको छ। यस्तै मन्त्री बलायरले बाढी प्रभावित गाउँको निरीक्षण गर्दै पीडितहरुको स्थिति र राहत वितरणबारे पनि जानकारी लिएको प्रेस सहयोगी रमेश जोशीले बताए।
प्रतिक्रिया दिनुहोस !
