आफ्नै फार्मेसीबाट सस्तोमा औषधि बेच्दा अस्पताललाई करोड नाफा

चितवन : आफ्नै फार्मेसी सञ्चालनबाट भरतपुर अस्पतालले मनग्य आम्दानी गरेको छ । बिरामीलाई सस्तोमा औषधि विक्री गरेर पनि नाफा गरेर अस्पतालको आम्दानी बृद्धि गरेको छ । फार्मेसी सञ्चालनबाट अस्पतालले ९ महिनामा १ करोड ६ लाख ५० हजार आम्दानी गरेको छ । चितवनको एक मात्र सरकारी अस्पताल भरतपुर अस्पतालले गतवर्षदेखि आफ्नै फार्मेसी सञ्चालनमा ल्याएको हो ।

यसअघि अस्पतालले नीजि फार्मेसीलाई मासिक १७ लाखमा सटर भाडामा दिने गरेको थियो । अस्पतालले नै फार्मेसी सञ्चालन गरेपछि मासिक २० लाख आम्दानी गर्न थालेको छ । साउन महिनामा २० लाख रुपैया आम्दानी भएको फार्मेसीका स्टोर प्रमुख राजकुमार ढुङ्गानाले बताए । 'हामीलाई नाफा चाहिएको होईन अन्तभन्दा धेरै सस्तोमा औषधि विक्री गरेका छौ' उनले भने 'अस्पतालले सेवामूलक काम गर्दा पनि आम्दानी बढेको छ' । अस्पतालले गतवर्षको कार्तिकदेखि आफैं फार्मेसी सञ्चालन गरेको थियो । सञ्चालनको पहिलो महिनामै साढे तीनलाख आम्दानी भएको थियो ।

त्यसका लागि सरकारले १५ लाख रुपैया दिएको थियो । सरकारबाट आएको रकम चलाउन नपाईने भएपछि उधारोमा औषधि किनेर फार्मेसी चलाइएको थियो । सस्तोमा औषधि बिक्रि गर्दा पनि अहिले मासिक ३ लाख रुपैयाँ बढी आम्दानी भएको छ । सार्वजनिक खरिद ऐन अनुसार औषधि खरिद गरिएको छ । टेण्डरबाट औषधि खरिद गर्दा कतिपय उच्च गुणस्तरका औषधितथा सामाग्री किन्न नसकेको अस्पतालले जनाएको छ । अस्पतालको फार्मेसीमा औषधि किन्नेको भीड लाग्ने गरेको छ । अहिले फार्मेर्सीको काउण्टर थप्ने तयारी गरिएको छ । यसअघि बजेट अभावका कारण फरक–फरक कम्पनीको औषधि राख्न समस्या थियो । आम्दानी बढेपछि चिकित्सकले सिफारिस गरिएको कम्पनीको औषधि राख्न थालिएको छ ।

'बजेट नहुँदा सुरुमा जटिल प्रक्रिया लाग्यो, औषधि बेचेर तिर्ने भनी उधारोमा औषधि किनेर चलायौं' अस्पतालका मेडिकल सुपरीटेण्डेन्ट डा. रुद्र प्रसाद मरासिनीले भने 'सरकारको नीति र जनताको सुविधाका लागि आफंैले फामेर्सी चलाएका हौ ' ।

सरकारको स्वास्थ्य बीमा कार्यक्रम लागु भएपछि यसका लागि सहज गराउन खोजिएको हो । सरकारी स्वास्थ्य बीमा गराउनेको उपचार भरतपुर अस्पतालमा हुनेछ । उनीहरुको सुविधाका लागि पनि सस्तोमा गुणस्तरीय औषधिको सुविधा हुने अस्पताल विकास समितिका अध्यक्ष राजकुमार राजभण्डारीले बताए । 'जनताको अस्पताल भएपछि जनतालाई सुविधा हुनुपर्छ भनेर लागेका हौं ' राजभण्डारीले भने ' अस्पतालको हरेक सेवा बिरामी मैत्री बनाएका छौं' । फार्मेसी सञ्चालन गरेपछि १३ जनाले प्रत्यक्ष रोजगार पाएका छन ।

अस्पतालले सेवा विशिष्टिकरण गर्दै गएको छ । पछिल्लो पटक नेपालकै ठूलो सिटी मेसिन ल्याएको छ । अस्पतालले न्यूरो सर्जरीको सेवा सुरु गरेको छ । अस्पतालबाट हुने खर्च कटौतीका लागि अस्पतालले लुगाधुने मेसिन, अक्सिजन प्लान्ट, फोहोर ब्यवस्थापन लगायतको काम गर्न थालेको छ ।