निर्वाचनको वातावरण बन्दै छ : महतो
राजविराज (अन्नपूर्ण) : राष्ट्रिय जनता पार्टी (राजपा) नेपालको अध्यक्षमण्डलका सदस्य राजेन्द्र महतोले संविधान संशोधनको विपक्षमा मतदान गर्ने दललाई जनताले ‘उचित जवाफ’ दिने बताएका छन् । बाढीप्रभावित क्षेत्र निरीक्षणका क्रममा शनिबार सप्तरी आएका नेता महतोले संविधान संशोधन मधेसी, आदिवासी जनजातिको माग बनेको उल्लेख गर्दै यस्तो दाबी गरेका हुन् ।
उनले संविधान संशोधन प्रक्रिया अगाडि बढेसँगै निर्वाचनका लागि सकारात्मक वातावरण बन्दै गएको धारणा व्यक्त गरे । यद्यपि, संसद्मा रहेका दलहरूले संविधान संशोधनमा देखाउने व्यवहारअनुसारको नीति बनाएर अघि बढ्ने उनले स्पष्ट पारे । उनले संशोधन विधेयकको पक्षमा मतदान गर्न आग्रह गर्दै विधेयक हुनेबित्तिकै राजनीतिक निकास निस्किने र निर्वाचनको बाटो सहज हुने दाबी गरे ।
उनले बाढीग्रस्त क्षेत्रमा पुनर्निर्माण र पीडितलाई क्षतिपूर्तिका लागि सरकारसँग २६ अर्ब रुपैयाँ छुट्ट्याउन माग गरिएको जानकारी दिए । पुनर्निर्माण प्रतिष्ठानजस्तै बाढीपीडितका लागि पनि प्रतिष्ठान गठन गरी पीडितलाई आवश्यक राहत प्रदान गर्नुपर्ने उनको भनाइ थियो ।
प्रतिक्रिया दिनुहोस !
