गोरखाका कर्मचारीहरुले बाढीपीडितलाई एकदिनको तलब दिने घोषणा

गोरखा : हालैको बाढी, पहिरो र डुबानकापीडितलाई गोरखाका राष्ट्रसेवक कर्मचारीहरुले एकदिनको पारिश्रमिक दिने भएका छन् । आइतबार बसेको कार्यालय प्रमुखहरुको बैठकले जिल्लाका करिब सरकारी कार्यालय, संस्थान तथा प्राधिकरणका कर्मचारीबाट एक दिनको पारिश्रमिक पीडितहरुलाई दिने निर्णय गरेको प्रमुख जिल्ला अधिकारी जितेन्द्र बस्नेतले जानकारी दिए ।

‘राष्ट्रिय बिपत्तिका बेला राष्ट्रसेवक कर्मचारीले पनि सक्दो सहयोग गर्नुपर्छ भन्ने प्रसंग उठ्दा यसरी सहयोग गर्ने निर्णय भएको हो' प्रजिअ बस्नेतले भने ‘यथासक्य छिटो सबै कार्यालय प्रमुखहरुले स्टाफ बैठक बस्नेछ । सबै कार्यालयले स्टाफहरुसँग रकम जम्मा गरेर बढीमा १५ दिनभित्र जिल्लामा संकलन हुनेछ र हामी प्रधानमन्त्री दैवी प्रकोप उद्धार कोषमा दिनेछौं ।'

साथै बैठकले बारपाकमा फैलिएको सिजनलफ्लू अन्यत्र फैलन नदिन कुनै पनि कसर बाँकी नराखी काम गर्ने पनि निर्णय गरेको छ । ‘थप स्वास्थ्यकर्मीहरु त्यहाँ पुगेका छन्' सहायक प्रजिअ केशवराज शर्माले भने ‘त्यसलाई केही दिनभित्रै नियन्त्रणमा लिई अन्यत्र फैलन नदिने निर्णय भएको छ ।'

बैठकमा स्थानीय तहमा ऐन नआएकाले काम गर्न कठिन भएको बारे चर्चा चलेको थियो । ऐन नआएको अबस्थामा काम गर्न अन्यौल भएको कार्यकारीहरुले गुनासो गरेका सप्रजिअ शर्माले बताए ।