एक वर्षमै थपिए १० ब्रान्डका स्मार्टफोन

काठमाडौं : नेपाली स्मार्टफोन बजारमा एक वर्षकै अवधिमा १० वटा स्मार्टफोन ब्रान्ड भित्रिएका छन् । सामसुङ, हुवावे, जियोनी, साओमी, कलर्स लेनेभोलगायत ब्रान्डका अतिरिक्त उक्त अवधिमा थप १० ब्रान्ड भित्रिएका हुन् ।तीमध्ये नौवटा ब्रान्ड चिनियाँ छन् । विश्वबजारमा सफल ब्रान्डका रूपमा स्थापित नयाँ १० ब्रान्डमध्ये केही नेपाली बजारमा स्थापित पुराना ब्रान्डका लागि समेत चुनौती बनेका छन् ।

एक वर्षमा यति धेरै स्मार्टफोन ब्रान्ड नेपाली बजारमा भित्रिएको यो पहिलो वर्ष रहेको व्यवसायीको भनाइ छ । बजारमा अहिले सामसङ, हुवावे, जियोनी, लेनोभो, कलर्स, साओमीलगायत तीन दर्जनभन्दा बढी स्मार्टफोन ब्रान्ड उपलब्ध छन् । त्यसमा करिब एक दजर्न ब्रान्ड गतवर्ष मात्र प्रवेश भएका हुन्।

गत एक वर्षको अवधिमा नेपाली स्मार्टफोनको बजारमा भित्रिएको स्मार्टफोनमध्ये चाइनिज ब्रान्ड जेडटीई एक हो । उसले सुरुवातमा सस्तोमा ब्लेड एल फाइभदेखि महँगोमा ब्लेड एस सेभेनसमेत सार्वजनिक गरेको थियो । जेडटीईसँगै नेपाली बजारमा भित्रिएको ओप्पो विश्व स्मार्टफोन बजारमा चौथो स्थानमा रहेको दाबी गरेको छ । यसको नेपाली बजारमा पनि सोहीअनुरूपको स्थान छ । एफ वान एस, ए-३७ र नियो-७ स्मार्टफोन भित्र्याएको ओप्पो आक्रामक बजार विस्तारका कारण नेपाली बजारमा रहेका पुराना ब्रान्डसँग प्रतिस्पर्धा गर्न सफल छ ।

ओप्पोलगत्तै अर्को चिनियाँ ब्रान्ड मेइजु नेपाली बजारमा प्रवेश गर्‍यो । उच्च प्रविधिका साथ ग्राहकलाई नयाँ अनुभव प्रदान गर्ने योजनाका साथ नेपाली बजारमा आएको मेइजुले अपेक्षाकृत रूपमा बजार भने लिन सकेन । मेइजु एकैपटक दुईवटा स्मार्टफोनका साथ बजारमा भित्रिएको थियो ।

त्यसमध्ये एमथ्री नोट एउटा हो । योसँगै नेपाली बजारमा अमेरिकी ब्रान्ड इनफोकसले आफ्नो उत्पादनको बिक्री सुरु गर्‍यो । इनफोकस अमेरिकी ब्रान्ड भए तापनि यो चीनबाट म्यानुफ्याक्चर भएर नेपाल भित्रिएको हो । यसले नेपाली स्मार्टफोनको बजारमा उपस्थिति मात्र जनाएको छ । कम्पनीसँग नेपाली बजारमा अहिले एम ३७० आई र एम ८०८ आइ दुई मोडल छन्, जुन ग्राहकमाझ प्रिय छन् ।

यो वर्षको सुरुवातसँगै नेपालमा नोकियाको पुनरागमन भयो । मोबाइल बजारमा कुनै समय एकछत्र राज गरेको नोकियाको पुनरागमनले विश्वबजार मात्र नभई नेपाली बजारमा पनि तरंग ल्यायो ।

गतवर्ष नै ताइवानी ब्रान्ड एचटीसी नेपाली बजारमा भित्रियो । चीनमा निर्माण भएर नेपाली बजारमा आउने एचटीसी ब्रान्डको उत्पादन नेपालमा त्यसअघि पनि नभएको भने होइन । गतवर्ष जेनेरेसन नेक्स्ट कम्युनिकेसन प्रालिले नेपालमा यो ब्रान्डलाई आधिकारिक रूपमा भित्र्याएको हो ।
कम्पनीले एकैपटक डिजायर ६३०, ६२८, ६२६, ७२८ र ८३० मोडलको स्मार्टफोन सार्वजनिक गर्‍यो । त्यसलगत्तै अर्को चिनियाँ ब्रान्ड ओट्टो नेपाली बजारमा सार्वजनिक भयो ।

न्युरोडस्थित ताम्राकार कम्प्लेक्समार्फत नेपाली बजारमा प्रवेश गरेको ओट्टोको प्रिमियम उत्पादन ओट्टो मार्क चर्चित छ । त्यसपछि बजारमा धमाकेदार रूपमा कुलप्याड ब्रान्डको स्मार्टफोन भित्रियो । चिनियाँ ब्रान्ड कुलप्याड आफ्नो प्रिमियम उत्पादन ‘कुल वान'का साथ बजारमा आएको थियो । जुन रूपले नेपाली बजारमा आएको जनाउ कुलप्याडले दियो, त्यसअनुरूपमा यसको बजार विस्तार भने हुन सकेन ।
गतवर्ष नै नेपाली बजारमा अर्को चिनियाँ ब्रान्ड एलिफोन पनि आयो । गोयन्का इन्फोटेकले नेपाली बाजरमा एलिफोनको एस ७, पी९००० र सी१ लगायत स्मार्टफोन ल्याएको हो । यसले पनि नेपाली स्मार्टफोन प्रयोगकर्ताको मन भने जित्न सकेन ।

यो वर्षको सुरुवातसँगै नेपालमा नोकियाको पुनरागमन भयो । मोबाइल बजारमा कुनै समय एकछत्र राज गरेको नोकियाको पुनरागमनले विश्वबजार मात्र नभई नेपाली बजारमा पनि तरंग ल्यायो । त्यो पनि नोकियाले आफ्ना पुराना ग्राहकका लागि भन्दै कम्पनीकै सबैभन्दा बढी बिक्री भएको बारफोन ‘नोकिया ३३१०' लाई पहिला सार्वजनिक गर्‍यो । अनि बिस्तारै स्मार्टफोनमा नोकिया थ्री, नोकिया फाइभ र नोकिया ६ लाई बजारमा ल्याएको हो ।

नोकियाको आगमनपछि बजारमा डुगी ब्रान्डको स्मार्टफोनले प्रवेश पाएको छ । नेपालमा भित्रिइसके पनि यसले आधिकारिक रूपमा प्रडक्ट सार्वजनिक भने गरेको छैन । यी ब्रान्डका अतिरिक्त टेक्नो, भिबो र मोटोरोला ब्रान्डका स्मार्टफोन यो वर्ष नेपाली बजारमा आउने तरखरमा छन् ।

यतिका संख्यामा नेपालमा नयाँ ब्रान्डका स्मार्टफोनको प्रवेशलाई स्मार्टफोनप्रति प्रयोगकर्ताको बढ्दो आकर्षणलाई लिन सकिने व्यवसायीको भनाइ छ । अर्कोतर्फ १० ब्रान्डमध्ये नौवटा चिनियाँ रहनुले चाइनिज ब्रान्डको नेपालमा बढ्दो प्रभावलाई पनि दर्साउने हुवावे मोबाइलका नेपालका लागि बजार व्यवस्थापक सुमित प्रधानांगको भनाइ छ । नयाँ ब्रान्डका लागि नेपाली बजार अवसर भएको उनले बताए । ‘नेपाली बजार सानो भए तापनि यहाँ स्मार्टफोन बोक्ने ग्राहक धेरै छन्', उनले भने, ‘नेपालको ठूलो जनसंख्याले बारफोन बोक्छ । बारफोन बोक्ने जनसंख्या बिस्तारै स्मार्टफोनतर्फ आकर्षित भएका छन् । यो कुनै पनि स्मार्टफोन कम्पनीका लागि बजार प्रवेशको उपयुक्त समय हो।'

नयाँ ब्रान्डका स्मार्टफोन कुनै एक रेन्जमा आफूलाई फरक बनाएर त्यसमा उत्कृष्ट ब्रान्डका रूपमा स्थापित हुने लक्ष्यका साथ आएका छन् । बजारमा कोही क्यामरा फोन, कोही सेल्फी फोन र कोहीले ब्याट्री ब्याकअपलाई लिएर ग्राहक तानिरहेका छन् । बजारमा यो संख्यामा नयाँ ब्रान्डका स्मार्टफोन भित्रिनु स्वाभाविक रहेको कलर्स मोबाइलका बजार प्रबन्धक राजजंग थापा बताउँछन् । यसले ग्राहकलाई छनोटको अवसर पनि सिर्जना गरेको छ । बजार प्रतिस्पर्धात्मकसमेत बनेको छ, जसकारण ग्राहकले थोरै मूल्यमा राम्रो सुविधा पाएका छन् ।