म्याराडोना फुटबल खेल्न भारत आउदै

कोलकाता : अर्जेन्टिनाका फुटबल लिजेन्ड डिएगो म्याराडोना च्यारिटी फुटबल खेल्न भारतमा आउने भएका छन् । सन् १९८६ को विश्वकप विजेता अर्जेन्टिनी टोलीका महत्र्वपूर्ण सदस्य म्याराडोना आगामी अक्टोवर २ देखि ४ तारिखसम्म भारतमा रहने भारतीय सञ्चारमाध्यमले जनाएका छन् । म्याराडोनाले अक्टोवर २ तारिखमा भारतीय क्रिकेट टोलीका पूर्वकप्तान सौरभ गांगुलीलगायत फुटबल, क्रिकेट, हकी र चलचित्र कलाकारसँग मिलेर प्रदर्शनी खेल खेल्नेछन् ।

‘म्याच फर युनिटी’ नामक च्यारिटी खेलमा भारतीय हकी टोलीका पूर्वकप्तान धनराज पिल्ले, बंगाली अभिनेता अविर चटर्जी, क्रिकेट खेलाडी मनोज तिवारी र दीपदास गुप्ताले पनि म्याराडोनासँग फुटबल खेल्नेछन् । कोलकातामा हुने उक्त च्यारिटी खेलमा मोहनबगानका पूर्वखेलाडी चिमा ओकोरी, जस रामिटेज र ओदाफा ओकोलीले पनि म्याराडोनासँग फुटबल खेल्नेछन् ।

प्रतियोगिताको आयोजना आदित्य स्कुल अफ स्पोर्ट्सले गर्न लागेको हो । म्याराडोनाको भारत भ्रमणको व्यवस्थापन भने मोक्ष स्पोर्ट्स भेन्चर्सले गरेको हो । मोक्ष स्पोर्ट्सका संस्थापक सताद्रु दत्तले पहिलो ३० मिनेट म्याराडोना र फुटबल खेलाडीबीच खेल हुने र त्यसपछि क्रिकेटर र कलाकारसँग खेल हुने जानकारी दिए । दुई च्यारिटी खेलपछि उनी भारतमै आयोजना हुन लागेको फिफा यू–१७ विश्वकप फुटबलको कार्यक्रममा सहभागी हुनेछन् ।

विश्वका दिग्गज फुटबलर म्याराडोना दोस्रोपटक भारत भ्रमणमा आउन लागेका हुन् । उनी यसअघि सन् २००८ मा पहिलो पटक भारत आएका थिए । त्यसबेला हजारौं फुटबलप्रेमीले म्याराडोनालाई विमानस्थलमा भव्य स्वागत गरेका थिए । १० वर्षपछि पुनः भारत भ्रमणको अवसर जुट्दा खुसी लागेको ५६ वर्षीय म्याराडोनाले बताएका छन् ।