रोनीको दुई सय गोल

लन्डन : इङ्लिस प्रिमियर लिग फुटबलमा एभर्टनले बलियो प्रतिद्वन्द्वी म्यानचेस्टर सिटीलाई उसैको मैदानमा १-१ गोलको बराबरीमा रोकेको छ । पहिलो हाफमै वेन रोनीले गोल गरे पनि दोस्रो हाफमा उक्त अग्रतालाई जोगाउन नसक्दा एभर्टन स्पष्ट तीन अंक हासिल गर्नबाट बञ्चित भएको थियो । रोनी लामो समय म्यानचेस्टर युनाइटेडमा बिताएर यसै सिजन एभर्टनमा आबद्ध भएका हुन् ।

रोनीले खेल सुरु भएको ३५औं मिनेटमा एभर्टनका लागि पहिलो गोल गरेका थिए । इङ्लिस प्रिमियर लिगमा रोनीले गरेको गोल संख्या पनि दुई सय पुगेको छ । ३१ वर्षीय रोनी सन् २००४ मा म्यान युनाइटेडमा आबद्ध हुनुअघि एभर्टनबाट व्यावसायिक फुटबल खेल्थे । उनी प्रिमियर लिगमा सर्वाधिक गोल गर्ने खेलाडीको सूचीमा दोस्रो स्थानमा छन् । यसअघि एलन सियररले मात्र प्रिमियर लिगमा दुई सय गोलको कीर्तिमान बनाएका थिए ।

निर्धारित समयको खेल सकिनुभन्दा आठ मिनेटअघि म्यान सिटीका लागि रहिम स्टर्लिङले जवाफी गोल गरेका थिए । स्टर्लिङ परिवर्तित खेलाडीका रूपमा मैदान प्रवेश गरेका थिए । खेलका क्रममा दुवै टोली १० खेलाडीमा समेटिएका थिए । पहिलो हाफको खेल सकिनुभन्दा ठीकअघि म्यान सिटीका कायल वाल्करले दोहोरो पहेँलो कार्ड पाएका थिए । यसैगरी निर्धारित समयको खेल सकिनुभन्दा दुई मिनेटअघि एभर्टनका मोर्गन पनि दोहारो पहेँलो कार्ड पाउँदै मैदानबाट बाहिरिएका थिए ।

‘मेरो लागि यो बिर्सनै नसकिने क्षण हो’, दुई सय गोल पूरा गरेपछि रोनीले भने । एभर्टनमा फर्किएयता खेलिएका दुई लिग खेलमा रोनीले दुई गोल गसिसकेका छन् । दुई खेल खेलेको म्यान सिटी चार अंकसहित लिग तालिकाको चौथो स्थानमा छ । एभर्टन पनि दुई खेलबाट चार अंक बटुल्दै तालिकाको आठौं स्थानमा आसिन छ । प्रिमियर लिग तालिकामा दुवै खेल जितेको म्यानचेस्टर युनाइटेड ६ अंकसहित पहिलो स्थानमा छ ।