नवलपरासीका बाढीपीडितलाई कांग्रेसको राहत
परासी: नवलपरासीमा बाढीबाट प्रभावित भएकामध्ये दुई गाउँपालिकाका पीडित परिवारलाई नेपाली कांग्रेसले राहत वितरण गरेको छ। कांग्रेस केन्द्रीय सदस्य एंव पूर्वगृहराज्यमन्त्री देबेन्द्रराज कँडेलको पहलमा काठमाण्डौंस्थित विभिन्न संस्था र कांग्रेस नेताहरुबाट राहत संकलन गरिएको राहत कांग्रेस जिल्ला समिति मार्फत् वितरण गरिएको हो।
करिब ३० लाख बराबरको राहत सामाग्रीमध्ये प्रयास नेपाल काठमाण्डौंले ट्रयाकसुटसहित लत्ता कपडा उपलव्ध गराएको छ। त्यसैगरी ड्राईफुड र अन्य खाद्यन्न सामग्री नेपाली कांग्रेस काठमाण्डौं क्षेत्र नं. ५का सचिव रजनी थापाले उपलव्ध गराएकी हुन्।
त्यस्तै तेल, नुन, दालसहितका अन्य खाद्यन्न सामग्री नवलपरासीका जिल्ला र नगरस्तरका नेताहरुले उपलव्ध गराएका थिए।जिल्लामा बाढीबाट दुई नगरपालिका र चार गाउँपालिका प्रभावित भएका छन्।
जसमध्ये अतिप्रभावित भइ विस्थापित भएका पाल्हीनन्दन र सरावल गाउँपालिकाकणका कुल १ हजार १ सय २२ परिवारलाई राहत वितरण गरिएको नवलपरासी कांग्रेस सभापति विष्णु लामिछानेले बताए।
मंगलबार र बुधबार दुई दिन लगाएर वितरण गरिएको राहत प्रतिघर ३ हजारको बराबरको रहेको लामिछानेले जानकारी दिए। जसमा पाल्हीनन्दनका सनईका ५ सय ५० र सरावल गाउँपालिकाका ५ सय ७२ घरधुरी रहेका छन्।
प्रतिक्रिया दिनुहोस !
