रुपन्देही र कपिलवस्तुका पनि महिलाको कपालमा हमला

भैरहवा : रुपन्देही र कपिलवस्तुका ५० भन्दा बढी महिलाको कपाल रहस्यमय ढंगले अदृश्य शक्तिले काटिदिएको छ। रुपन्देही र कपिलवस्तुका महिला अदृश्य शक्तिले कपाल काटिदिएपछि आतंकित बनेका छन्। रहस्यमय ढंगले अदृश्य शक्तिले हमाला गरी कपाल काटिदिएको घटना बढेपछि महिला आतंकित बनेका हुन्।

 

पीडित महिलाका अनुसार कसैलाई बेहोस बनाएर कपाल काटिएको छ। प्रहरी एवं स्वास्थ्यकर्मीको टोलीले यस विषयमा अनुसन्धान थाले पनि कपाल कसले काटेको हो भन्ने प्रष्ट हुन सकेको छैन।

‘श्रीमानले तिम्रो कपाल काटेछ भन्नुभयो,’ सिद्धार्थनगर नगरपालिका ९ डाँडागाउँ निवासी ३५ वर्षीया गीता ज्ञवालीले भनिन्, ‘कपाल काटेको देखेपछि हामी आतियौं र प्रहरीलाई खबर गर्यौं।’

उनले थपिन, ‘बिहान नुहाउदै गर्दा हातमा लामो कपाल देखेर एकपटक झस्याङ भएकी थिएँ। तर, त्यो कपाल त्यसै हरायो पछि देखिन। नुहाइसकेर कपाल गुजुल्टो पारेकी थिएँ, सुरुमा श्रीमानले कपाल काटेको देख्नुभएको हो।’

यसरी कपाल काटिने घटनाले स्थानीय महिला त्रासमा छन्। ‘त्यो घटनापछि मलाई निन्द्रा लागेको छैन। कुनै काम गर्न मन लाग्दैन। भारतमा यस्तो घटना भएको मैले सुनेकी थिएँ। तर, यहाँ पनि यस्तो हुन्छ भन्ने मैले सोचेकै थिइनँ। तर, म अच्चमसंग हमलामा परेँ।’

अर्की एक महिला ओमसतिया गाउँपालिका ६ की सावित्री जयसवालले पनि बुधबार नै आफ्नो कपाल गुमाइन्। सावित्रीमाथि भएको सो घटनालगत्तै पीडित महिला र परिवारका अन्य सदस्य भैरहवास्थित भिम अस्पताल आएका छन्।

‘फेसबुक र समाचारबाट कपाल काटेको हल्ला व्यापक सुनेका थियौं, विश्वास लागेको थिएन। तर आज आफ्नै श्रीमतीमाथि अदृश्य हजामले हमला गरेर कपाल खौरीदियो,’ कृष्ण ज्ञवालीले घटना सम्झदै भने, ‘यो घटना रहस्मय छ, अनुसन्धान गरी वास्तविकता पता लगाउनपर्छ।’

१० सेकेन्ड जतिमा बेहोस हुने र कपाल काट्ने सबै कुरा भइसक्छ। लुम्बिनी सास्कृतिक नगरपालिका, गैडहवा गाउँपालिकामा पनि यस्तै घटना भएको कुरा प्रहरी एवं अस्पतालका स्वास्थ्यकर्मीले बताएका छन्।

लुम्बिनी सांस्कृतिक नगरपालिकास्थित कालीदह बस्ने किशोर यादवको छोरी १९ बर्षीया गंगा यादवको बिहानै सात बजे अकस्मात कपालको टुप्पो खसेको र पछि अचेत बनेपछि उपचारका निम्ति भारत पुर्याएको सुनाए।

यसैगरी सोही गाउँका घरभरन यादवकी छोरी २१ बर्षीया बबिताको कपाल भूईमा झरेपछि अचेत भएको पारिवारका सदस्यले बताए। बिरामी यादवको बोली बन्द भई सक्दा पनि ईशाराले टाउको दुख्ने प्रतिक्रिया जनाएपछि सामान रूपमा सलाइन पानी चढाउने गरेको उपचारमा संलग्न चिकित्सिक मोहम्मदजमाले बताए।

सबैभन्दा बढी लुम्बिनी सांस्कृतिक नगरपालिकाका महिलाको कपाल काटिएको छ। लुसाप २ भुजहिया निवासी प्रहलाद यादवकी बुहारी ३५ बर्षीया शान्ती यादव, वडा नं. ७ की सुमित्रा गोसाई, १३ की पूजारी यादवको १६ बर्षीया छोरी अनिता यादव, ओडवलियाका राजेश यादवको श्रीमती चन्द्रकला यादव, समरीमाई गाउँपालिका वडा नं. ३ थुम्हवा पिपरहवा निवासी ४० बर्षीया मैना धवलको पनि रहस्मयढंगले अदृश्य शक्तिले अकस्मात कपाल काटिदिएको घटना सार्वजनिक भइसकेका छन्।

केहीपीडित महिला डराएर अचेत भएपछि प्रहरी तथा स्थानीयको सहयोगमा एम्बलेन्सबाट भीम अस्पताल भैरहवा पठाइएको प्रहरी चौकी कालीदहका इन्चार्ज चिन्तामणि न्यौपानेले जानकारी दिए।
अकस्मात कपाल काटिएको घटनाले बिरामी हुँदा सामान्य उपचारपछि घर फर्काइएको छ।

कसैले कथित हमलाकारीलाई नदेख्नुबाट पनि अनुसन्धानमा जटिलता भएको प्रहरी उपरीक्षक श्यामलाल ज्ञवालीले बताए। जिल्ला प्रहरी कार्यालयले कपाल काट्ने हल्ला मात्रै नभई घटनाका धेरै उजुरी प्राप्त भएकोले उनको भनाइ छ।

‘केवल पीडितले हमलाकारीलाई देखेको वा महसुस गरेको भनेका छन, हामी यस्ता घटनाको गहिराईमा पुग्छौं। त्यतिन्जेलसम्म म सबैलाई हल्लामा विश्वास नगर्न अपील गर्दछु,’ प्रहरी उपरीक्षक ज्ञवालीले भने।