विहारमा अलपत्र कन्टेनर भन्टाबारी नाकाबाट ल्याइने
विराटनगर : भारतको विहारस्थित फारबीसगन्ज-जोगवनी सडकखण्डमा अलपत्र मालवाहक गाडी भीमनगर-भन्टाबारी छोटी भन्सारको बाटोबाट नेपाल ल्याइने भएको छ । यस विषयमा नेपाल र भारत सरकारबीत सहमति भएको छ ।
आयातनिर्यातका लागि मेरुदण्डका रूपमा रहेको भारत विहारको फारवीसगन्ज-जोगवनी सडकखण्डमा पर्ने परमान नदीको मिरगन्ज पुल बाढीका कारण भासिएपछि नेपालतर्फ आउँदै गरेका एक हजारभन्दा धेरै कन्टेनर र मालवाहक गाडी चार दिनदेखि अलपत्र थिए । केही दिनअघि आएको बाढीबाट मिरगन्जको फालमे पुल भासिएपछि सुरक्षाकर्मीले सुरक्षाका कारण देखाएर ठूला र मालवाहक सवारीसाधन आवतजावतमा रोक लगाएको थियो । उद्योग संगठन मोरङ र मोरङ व्यापार संघको मागअनुसार ती गाडी भन्टाबारी नाकाबाट नेपाल भित्र्ययाउन बुधबार सहमति भएको हो ।
पुलको मर्मत नभएसम्म नेपाल र भारततर्फ आयातनिर्यात सहज बनाउन भन्टाबारी-भीमनगर छोटी भन्सार प्रयोग गर्न पाउने अनुमति प्राप्त भएको मोरङ व्यापार संघका कार्यवाहक अध्यक्ष सुशील जोशीले जानकारी दिए । ‘नेपालतर्फबाट मोरङका प्रमुख जिल्ला अधिकारी रामप्रसाद आचार्य, विराटनगर भन्सार कार्यालयका अधिकृत र भारततर्फबाट जोगबनी भन्सारका डेपुटी कमिसनर पवन कुमारबीच विराटनगरमा यस विषयमा सहमति भएको हो ।
यो रुटबाट नेपाल आउन सवारीसाधनले करिब ५० किलोमिटर अतिरिक्त दूरी तय गर्नुपर्नेछ ।
उद्योग संगठन मोरङका अध्यक्ष मुशेक उपाध्यायले यो निर्णयबाट व्यापारीलाई राहत मिल्ने बताए । हेभी सवारीसाधन आवतजावतमा पूर्ण बन्देज लगाउनाले सुनसरी-मोरङ औद्योगिक करिडोरका उद्योग-व्यवसायको कच्चापदार्थ तथा उत्पादित वस्तुलगायत दैनिक उपभोग्य वस्तु आयातनिर्यातमा समस्या भएको थियो ।
भन्टाबारीका लागि बथनाहाबाट मालवाहक गाडी भारतको स्टेट हाइवे हुँदै वीरपुरको बाटोबाट भीमनगरतर्फ जानेछन् । यो रुटबाट नेपाल आउन सवारीसाधनले करिब ५० किलोमिटर अतिरिक्त दूरी तय गर्नुपर्ने मोरङ व्यापार संघका महासचिव नवीन रिजालले जानकारी दिए । विराटनगर नाकाबाट प्रवेश गर्ने गरी तेस्रो मुलकबाट आयात गरिएका मालसामान भीमनगरर कोसी ब्यारेज भन्सारबाट ल्याउनेछ ।
नेपालको भन्सार विभागले बुधबार नै विराटनगर भन्सार कार्यालयमा परिपत्र गर्दै भीमनगर-कोसी ब्यारेज भन्सारबाट आयातनिर्यात गर्न निर्देशन गरेको छ । तेस्रो देशबाट पैठारी गरिएका सामान जोगबनी भन्सारले जाँचपास गरेको प्रमाणका आधारमा भारतको भीमनगर भन्सारको बाटोबाट कोसी ब्यारेज हुँदै नेपाल प्रवेश गर्नेछन् । ती सामान विराटनगर भन्सारको यार्डमा ल्याएर जाँचपास हुनेछन् । भारतबाट गरिने पैठारी भीमनगर नाकबाट हुनेछ । राजस्व बुझ्नेलगायत सबै काम विराटनगर भन्सारबाट हुनेछ ।