सिन्धुली : हिन्दु महिलाहरुको महान पर्व हरितालिका तीजको अवसर पारि सिन्धुलीका विभिन्न महादेवका मन्दिरहरुमा हजारौं महिला भक्तजनहरु पुजाआजामा व्यस्त भएका छन् । जिल्ला सदरमुकाम माढी बजारस्थित काली कमलामाई, माझीटारस्थित शिव महादेव, रामेश्वरधाम, शिद्धबाबा, कुशेश्वर महादेव लगायतका दर्जनौं मन्दिरहरुमा हजारौ भक्तजनहरु बिहीबार बिहानदेखीनै पुजाआजा गरीरहेका छन् ।
जिल्लाकै प्रख्यात कुशेश्वर महादेव, शिद्धबाबा मन्दिरमा बिहान ६ बजेदेखि महिलाहरु पुजाआजाका लागि लाइनमा बसेका छन् । लाइनमा बसेका भक्तजनहरुलाई मन्दिर व्यवस्थापन समिति, सुरक्षा निकायले सहयोग गरेका छन् । राति दर खाएर निराधार बर्त बसेका महिलाहरु दिनभर मन्दिरमा पुजाआजा गर्ने, नाचगान गर्ने, एक अर्कामा सुखदुःख आदान प्रदान गर्ने गरिहेका छन् ।
सौभाग्यका प्रतिक रातो सारी, चुरा, पोते र गरगहनामा सजिएका महिला झिसमिसे बिहानदेखि नै शिवको पुजाअर्चना गर्न विभिन्न स्थानमा रहेका शिव मन्दिरहरुमा लामबद्ध छन् ।भगवानको आराधनासहित महिलाहरुले तीज गीतको भाकामा आफ्ना पीडा पोख्दै गीत गाउने र नाच्ने चलन रहेको छ ।
हिमालय पर्वतकी पुत्री पार्वतीले बाल्यकालदेखि महादेव स्वामी पाऊँ भनी मनमनै कामना गरिरहेको भए पनि पिता हिमालयले भगवान् विष्णुलाई कन्यादान दिन तयारी गरेको थाहा कसैले नदेख्ने ठाउँमा लुकाएर राखेको र सोही स्थानमा पार्वतीले महादेव स्वामी पाऊँ भनी निर्जला ब्रत बसेको हुनाले यसलाई हरितालिका तीजको ब्रत भन्ने गरिएको पुराणमा वर्णन गरिएको छ ।
हिन्दू नारीहरुको महान् धार्मिक पर्वका रुपमा लिइने हरितालिका ब्रतमा पतिको लामो आयुको कामना गरी निराहार ब्रत बसेर रातभर आफ्नो अटल सौभाग्यको प्रतीकस्वरुप दियो, कलश स्थापना गरी भोलिपल्ट गोदान र पूर्ण पात्र गरेर ब्रत तोड्ने परम्परा छ ।
प्रतिक्रिया दिनुहोस !
