खोलाले बगाएर तीन बालकको मृत्यु

हेटौंडा : मकवानपुरको पश्चिमी मनहरी गाउँपालिका ७ स्थित मनहरी खोलामा डुबेर तीन बालकको मृत्यू भएको छ । पौडी खेल्न गएका उनीहरुको बिहीबार मध्यान्न खोलाले बगाएर मृत्यू भएको ईलाका प्रहरी कार्यालय मनहरीका प्रहरी निरीक्षक चित्र घलेले बताए ।

मृत्यू हुनेमा वडा नम्बर ७ निवासी १० वर्षीय अलेश रुम्बा लामा, ११ वर्षीय अमन थिङ र १२ वर्षीय प्रकाश रुम्बा रहेको घलेले जानकारी दिए । उनीहरुसँगै डुबेका १५ वर्षीय बुद्ध लामालाई भने स्थानीयले उद्धार गरेका छन् । लामालाई उपचारको लागि भरतपुर अस्पताल लगिएको प्रहरी निरीक्षक घलेले बताए ।

पूर्व पश्चिम राजमार्ग अन्तर्गत मनहरी पुलबाट करिब पाँचसय मिटर माथि तिब्र बेगको खोलामा पौडी खेल्न गएका उनीहरु तैरन नसक्दा खोलाले बगाएर मृत्यू भएको उनले जानकारी दिए । नौ जनाको समूहमा बालवालिकाहरु मनहरी खोलामा पौडी खेल्न गएका थिए । ‘घटना थाहा पाएको दश मिनेटमा नै हामी पुग्यौ, तर उनीहरुलाई बचाउन सकिएन’, प्रहरी निरीक्षक घलेले भने । मृतकहरुको शव पोष्टमाटमको लागि हेटौंडा अस्पताल पठाईएको इलाका प्रहरी कार्यालय मनहरीले जनाएको छ ।