बाँकेका केन्द्रीय तहका मधेसी नेता माओवादी प्रवेश

नेपालगन्ज : पछिल्लो समयमा मधेसी पार्टीको दोधारे नीतिका कारण बाँकेका केन्द्रीय स्तरका नेताले पार्टी छोडेका छन् ।

प्रदेश नं. ५ को निर्वाचन वहिष्कारपछि असन्तुष्ट रहँदै आएका राष्ट्रिय जनता पार्टी (राजपा) नेपालका केन्द्रीय सदस्य आदेश कुमार अग्रवाल, जिल्ला उपाध्यक्ष करिम अहमद अन्सारी ‘प्रधान’, राजपाका चर्चित नेता ललित कुमार रौनियार, संघीय समाजवादी फोरमका केन्द्रीय सदस्यद्वय जगदिश बहादुर सिंह र कान्ताप्रसाद खटिकाले पार्टी परित्याग गरी नेकपा माओवादी केन्द्रमा प्रवेश गरेका छन् ।

युवा नेता अग्रवाल नेपालगन्ज उपमहानगरपालिकाको मेयरका दाबेदार रहेका थिए । अग्रवाल नेपालगन्ज उद्योग वाणिज्य संघका कोषाध्यक्ष समेत हुन् ।

माओवादी केन्द्रमा प्रवेश गरेका अन्सारी राजपाका जिल्ला उपाध्यक्ष हुन । अन्सारी साविक जयसपुर गाविसका अध्यक्ष हुन् । रौनियार, मधेस आन्दोलनमा सधै अग्रपंक्तीमा रहेर पटक–पटक गिरफ्तार हुँदै आएका थिए । आन्दोलनका क्रममा धेरै पटक रौनियार घाइते समेत भएका थिए ।

स्थानीय तहको निर्वाचनको समयमा रौनियारले नेपाली कांग्रेसका मेयरका उम्मेदवार डा. सुरेश कुमार कनोडियाको गाडी तोडफोड गरेका थिए । रौनियार तराई मधेस लोकतान्त्रिकका जिल्ला सचिव, जिल्ला उपाध्यक्ष भएका थिए । उनी हाल राजपाका बाँकेका प्रभावशाली नेताका रुपमा परिचित थिए । मधेसप्रति बढी सदासयता देखाउने अभिव्यक्तिका कारण रौनियार धेरै पटक विवादमा समेत परेका छन् ।

त्यस्तै संघीय समाजवादी फोरमका केन्द्रीय सदस्यद्वय सिंह र खटिका मधेस आन्दोलनको सुरुवातदेखि फोरममा सक्रिय रहदै आएका थिए । स्थानीय तहको निर्वाचनको समयमा सिंहले डुडुवा गाउँपालिकाको अध्यक्षमा उम्मेदवारी दर्ता गराएका थिए ।

फोरमले भर्खरै नेपाली कांग्रेसबाट प्रवेश गरेका विजय यादवलाई उम्मेदवारी बनाएपछि सिंहको उम्मेदवारी खारेज भएको थियो । सिंह नेपाल राष्ट्र बैंकका सेवा निवृत प्रबन्धक हुन् ।

उनीहरुलाई माओवादी केन्द्रका अध्यक्ष पुष्पकमल दाहाल ‘प्रचण्ड’ले टीका लगाई पार्टीमा प्रवेश गराएको माओवादी केन्द्रका पोलिब्युरो सदस्य दामोदर आचार्यले जानकारी दिए । राजपा छोडेर माओवादीमा प्रवेश गरेका अग्रवालले मधेशी दलको ध्यान २ नम्बर प्रदेशमा मात्र केन्द्रित भइ ५ नम्बर प्रदेशका नेता कार्यकर्ताको विचल्ली भएपछि पार्टी छोड्न बाध्य भएको बताए ।

‘संविधान संशोधन फेलपासको नाटक गर्नु नै थियो भने ५ नम्बरको निर्वाचन हुनुभन्दा पहिले नै गरेको भए हुन्थ्यो । हामी जस्ता नेता कार्यकर्ता विचल्लीमा त पर्ने थिएनौँ ।’ अग्रवालले भने, ‘मधेसी दलको ध्यान मात्र २ नम्बरमा केन्द्रित छ । हामीले त मधेसी दलको नेता र कार्यकर्ता भएको फिलिङ्गसम्म गर्न सकेनौँ । बाध्य भएर पार्टी छोड्यौँ। उनले प्रदेश नम्बर ५ का नेता कार्यकर्तालाई मधेसी दलका पूर्व नेता सधै विभेद गर्ने गरेका समेत बताए ।

उनले माओवादीले मधेसी, मुस्लिम, जनजाति, सबैलाई मिलाएर लाने विश्वासका साथ प्रवेश गरेका बताए । युवा नेता अग्रवालले अब माओवादी भित्र बसेर मधेसका मुद्दाहरु उठाउने बताए ।