दोहा : कतारले इरानसँग बिहीबार कूटनीतिक सम्बन्ध कायम गरेको छ । साउदी अरेबियालगायतका खाडी मुलुकले आफूमाथि नाकाबन्दी लगाउँदै आएका बेला उसले यस क्षेत्रकै शक्तिशाली मुलुक इरानसँग सम्बन्ध गाँसेको छ ।
साउदी, संयुक्त अरब इमिरेट्स, बहराइन, इजिप्ट लगायत मुलुकले इरानसँग सम्बन्ध तोड्न भनेर दबाब दिइरहेका बेला कतारले यस्तो निर्णय लिएको हो । कतारले आफूले इरानसँग कूटनीतिक सम्बन्ध राखेको घोषणा गरेको छ ।
यद्यपि उसले अरेबियालगायतका मुलुकले आफूमाथि लगातार नाकाबन्दी गरेका कारण इरानसँग नजिकिएको संकेत पनि गरेको छैन । ती मुलुकले नाकाबन्दी हटाउन गत जुनमा कतारसामु १३ बुँदे शर्त अगाडि सारेका थिए ।
कतारी टेलिभिजन च्यानल अलजजिरा बन्द गर्नुपर्ने, इरानसँगको सम्बन्ध दूर गर्नुपर्ने, कतारी भूमिबाट टर्कीको फौज हटाउनुपर्ने र मुस्लिम ब्रदरहुड लगायतका समूहसँगको सम्बन्ध तत्काल अन्त्य गर्नुपर्ने प्रमुख माग थिए । कतारले भने ती शर्त पूरा नहुने खालका भएको र सार्वभौम राष्ट्रले पूरा गर्न नसक्ने पनि बताएको थियो । कतारले खाडी क्षेत्रका देशहरूसँग जुन महिनादेखि चलिरहेको संकटका बारेमा पनि केही बताएको छैन । जुनमा एक्कासी साउदीलगायतका मुलुकले कतारसँग जल, स्थल, वायु सबैखाले सम्बन्ध सकिएको घोषणा गरेका थिए ।
कतारको विदेश मन्त्रालयले विज्ञप्ति जारी गर्दै भनेको छ, ‘कतारले इरानसँग हरेक क्षेत्रमा द्विपक्षीय सम्बन्ध मजबुत बनाउने छ ।’ इरानको सरकारी सञ्चारमाध्यमले यो विषय आफूलाई थाहा भए पनि विस्तृत जानकारी दिएको छैन ।
कतारले आफूमाथि लगाइएको नाकाबन्दीविरुद्ध विश्व व्यापार संगठन,(डब्ल्युटिओ)मा पनि उजुरी गरेको थियो । कतारले आफू कहिले पनि आतंकवादी घटनामा नमुछिएको स्पष्ट पारेको थियो । इरानसँग कतारको सिमाना करिब चार किलोमिटर छ ।
कतारमाथिको नाकाबन्दी हटाउन कुवेत सरकारले मध्यस्थता प्रयास गरेको थियो । यसैगरी टर्कीका राष्ट्रपति रिसेप तैयप एर्दोगानले उठाएका कदम पनि निरर्थक बनेका थिए ।
प्रतिक्रिया दिनुहोस !
