मापसेमा पर्नेहरू कागजपत्र लिनै जाँदैनन्
काठमाडौं : मादक पदार्थ सेवन (मापसे) कारबाहीमा परेका चालकमध्ये अधिकांश सवारीचालक अनुमतिपत्र, ब्लू बुक लिन नजाँदा महानगरीय ट्राफिक प्रहरी महाशाखामा हजारौं कागजपत्र थन्किएका छन् ।
मापसे कारबाहीमा परेका चालकका लाइसेन्स, ब्लू बुकलगायत २० हजार ५ सय ३५ कागजपत्र महाशाखामा अझै थन्किएका हुन् । खासगरी निजी सवारीधनीले मापसे कारबाहीपछि सचेतना कक्षा लिनुपर्ने भएकाले त्यसलाई आफ्नो प्रतिष्ठासँग जोडेर हेर्नाले कागजपत्र लिन नआउने गरेको महाशाखाले जनाएको छ ।
महाशाखा प्रमुख प्रहरी नायव महानिरीक्षक (डीआईजी) सर्वेन्द्र खनाल भन्छन्, ‘चालकलाई नियम मान्न गाह्रो, कारबाहीमा पर्दा लाज मानेर कागजपत्र बुझ्न नआउने समस्या छ । तीन महिनाभित्र पनि लिन नआए कारबाहीका लागि यातायात व्यवस्था विभागमा बुझाइदिन्छौं ।’
मापसे कारबाहीमा परेपछि सचेतना कक्षा लिन चालकलाई टाउको दुखाइको विषय बनेको बुझाइ खनालको छ । ‘एकपटक कारबाहीमा परेपछि प्रतिष्ठा हुने तर ६÷६ पल्ट कारबाहीमा पर्दा प्रतिष्ठा नहुने ? हामीले मापसे रोकेका हैनौं, सेवन गरेर सुरक्षाका लागि सवारी नहाँक्नोस् मात्र भनेका हौं’, उनले भने, ‘चालक कहिले सचेत हुने ? ’
२०६९ साल मंसिरमा सुरु कारबाही अभियानअन्तर्गत ट्राफिकले हालसम्म मापसे गरी सवारी हाँक्ने २ लाख ४० हजार ६ सय ६५ जना चालकलाई कारबाही गरेको छ । यीमध्ये १ लाख ४८ हजार ५ सय ५१ चालकको लाइसेन्समा ट्राफिकले प्वाल पारिसकेको छ । महाशाखाका अनुसार सरकारका सचिवदेखि सांसद, सुरक्षा निकायका वरिष्ठ कर्मचारीसमेत मापसे कारबाहीमा परेका छन् ।
लाइसेन्समा पाँचवटा प्वाल पार्ने कोठा सकेपछि पनि चालकले मापसे गर्न नछाडेको कारबाही अभिलेखले देखाएको छ । यसअनुसार तीन सय ५० चालक निलम्वनमा परेका छन् । उनीहरू छैटौंपटक मापसे कारबाहीमा परेका चालक हुन् । ट्राफिक प्रहरीले उनीहरूलाई ६ महिनाका लागि सवारी साधन चलाउन नदिन यातायात व्यवस्था विभागमा सिफारिस गरेको छ । मापसे गरी सवारी हाँक्नेमा पुरुष चालक मात्र होइन, महिला पनि छन् । महाशाखाका अनुसार हालसम्म १ हजार चार सय ९२ महिला चालक मापसे कारबाहीमा परेका छन् ।
मापसे कारबाहीपछि कागजपत्र लिन नजाने र अर्को अञ्चलबाट लाइसेन्स निकाल्ने गरेको प्रमाणसमेत ट्राफिकले फेला पारेको छ । ट्राफिक प्रहरीका अनुसार चारजना चालकले एकभन्दा बढी लाइसेन्स निकालेको पाइएको छ । अर्कोतर्फ सक्कली लाइसेन्स कारबाहीमा परेपछि चालकले नक्कलीसमेत लिँदै आएका छन् । महाशाखाले दुई वर्षमा १६ वटा नक्कली लाइसेन्स फेला पारेको छ । ती चालकले लिन नगएपछि उनीहरूका सक्कली लाइसेन्स अझै महाशाखाकै अभिलेखमा छन् ।
लाइसेन्समा कति पटक प्वाल ?
पहिलोपटक - १११९६९
दोस्रोपटक - २४५३७
तेस्रोपटक - ७९६०
चौथोपटक - २७५९
पाँचौंपटक- ९७८
छैटौंपटक (निलम्वित) -३४८
प्रतिक्रिया दिनुहोस !
