राजपा सबै निर्वाचनमा जाने, चुनाव चिह्न साइकल

काठमाडौं : लामो अन्योल चिर्दै राष्ट्रिय जनता पार्टी नेपालले अब सबै निर्वाचनमा सहभागी हुने निर्णय गरेको छ । राजपा अध्यक्षमण्डलका नेताहरूले बिहीबार राजधानीमा पत्रकार सम्मेलन गरी असोज २ गतेका लागि निर्धारित तेस्रो चरणको स्थानीय निर्वाचनदेखि प्रदेशसभा र केन्द्रीय संसद्सम्मको निर्वाचनमा सहभागी हुने जानकारी दिए । संविधान संशोधन विधेयक संसद्बाट अस्वीकृत भएपछिको परिस्थितिबारे छलफल गर्न मंगलबारदेखि दुई दिन बसेको पदाधिकारी बैठकले निर्वाचनमा जाने निर्णय गरेको हो ।

पत्रकार सम्मेलनमा पदाधिकारी बैठक र त्यसपछि बसेको अध्यक्षमण्डल बैठकको निर्णय सुनाउँदै नेता राजेन्द्र महतोले स्थानीय तहदेखि केन्द्रसम्म जोडदार उपस्थिति दर्ज गराउन निर्वाचनमा जाने निर्णय गरेको जानकारी दिए । संशोधन विधेयक अस्वीकृत हुनुमा सरकार र प्रमुख प्रतिपक्षी एमाले दुवैको कमजोरी औंल्याउँदै नेता महतोले संशोधनका लागि शान्तिपूर्ण आन्दोलन जारी राख्ने बताए । संशोधन असफल भएको विरोधमा राजपाले यही भदौ ९ देखि २१ गतेसम्म हातमा कालोपट्टी बाँधेर विरोध जनाउने निर्णय गरेको छ ।

 

राजपाले उम्मेदवारी मनोनयनदेखि निर्वाचनका लागि पर्यवेक्षक खटाउने जिम्मेवारी तोकेको छ । भदौ ९ देखि १३ गतेसम्म स्थानीय तहमा उम्मेदवार छनोट गर्ने अनि घोषणापत्र मस्यौदा समितिसमेत चाँडै बनाउने उक्त पार्टीले जनाएको छ । राजपाले उम्मेदवारी मनोयनका लागि केन्द्रबाटै प्रदेश नम्बर २ का आठ जिल्लामा पर्यवेक्षक खटाएको छ । सप्तरीमा नरसिंह चौधरी, सिरहामा गजाधर यादव, धनुषामा अरुण सिंह, महोत्तरीमा गोविन्द चौधरी, सर्लाहीमा शेखर सिंह, रौतहटमा सत्यनारायण मण्डल, बारामा मालामती राना थारू र पर्सामा विजय गुप्ता पर्यवेक्षक तोकिएका हुन् ।

- स्थानीय तहदेखि केन्द्रसम्म जोडदार उपस्थिति दर्ज गराउन निर्वाचनमा जाने निर्णय
- संविधान संशोधन असफल हुनुमा सरकार र एमाले दोषी

राजपा संयोजक महन्थ ठाकुरले दुई चरणको स्थानीय निर्वाचनमा सहभागी नभएकै कारण सरकारले मधेस आन्दोलनका क्रममा मारिएका सबैलाई सहिद घोषणा गरेको, मुद्दा फिर्ता लिएको र स्थानीय तहको संख्या बढाएको दाबी गरे । ‘यी सबै हाम्रै आन्दोलनको उपलब्धि हुन्', संयोजक ठाकुरले भने । उनले साइकल चिह्न लिएर निर्वाचनमा जान लागेको जानकारी दिए । ‘मैले आजै निर्वाचन आयोगसँग यसबारे छलफल गरेको छु, साइकल चिह्न लिने अनौपचारिक जानकारी आयोगलाई गराएका छौं', उनले भने । साइकल चिह्न शरदसिंह भण्डारी नेतृत्वको तत्कालीन राष्ट्रिय मधेस समाजवादी पार्टीले प्रयोग गरेको थियो । अध्यक्षमण्डलका सदस्य अनिल झाले भने निर्वाचनमा जाने निर्णयप्रति असहमति जनाएको स्रोतले जनाएको छ । उनी पत्रकार सम्मेलनमा सहभागीसमेत भएनन् ।