राणाले हस्ताक्षर बुझाएका नौ केन्द्रीय सदस्य राप्रपामै, राप्रपा प्रजातान्त्रिकलाई संसद्मा मान्यता

काठमाडौं : पशुपतिशम्सेर राणा नेतृत्वको राप्रपा प्रजातान्त्रिकले दल दर्ताका लागि निर्वाचन आयोगमा हस्ताक्षर बुझाएका दुई सांसदसहित नौ केन्द्रीय सदस्यले आफूहरू कमल थापा नेतृत्वको राप्रपामै रहेको बताएका छन् ।

राप्रपाले शुक्रबार नौ जनालाई उपस्थित गराएर पत्रकार सम्मेलनमार्फत उक्त कुराको जानकारी दिएको हो । संसदीय दलको कार्यालय सिंहदरबारमा आयोजित पत्रकार सम्मेलनमा सांसद राजेश्वरीदेवी साह र लीलादेवी श्रेष्ठ, केन्द्रीय सदस्य प्रह्लादप्रसाद साह, बिन्दा गिरी, सविना साह, रेणु साह, निरञ्जन थापा, दिलविकास राजभण्डारी र डा.भीमसेन गुरुङले आफूहरू विभाजनको पक्षमा नरहेको बताए ।

 

पत्रकार सम्मेलनमा राप्रपा अध्यक्ष कमल थापाले ४० प्रतिशत नपुग्दानपुग्दै एकलौटी र हचुवाको भरमा निर्वाचन आयोगले दल दर्ता गरेको आरोप लगाए । ‘राप्रपा प्रजातान्त्रिकको दल दर्ता गर्दा संविधान र सर्वोच्चको आदेश पालना नभएकाले त्यसविरुद्ध आइतबार सर्वोच्च जान्छौं', उनले भने ।

राप्रपा प्रजातान्त्रिकलाई संसदमा मान्यता

पशुपतिशम्शेर राणा नेतृत्वको राष्ट्रिय प्रजातन्त्र पार्टी प्रजातान्त्रिकले व्यवस्थापिका संसद्मा आधिकारिक मान्यता प्राप्त गरेको छ । यससँगै राणा समूहको पार्टी संसदीय दल बनेको छ । प्रवक्ता किरण गिरीका अनुसार संसदीय दल बनेसँगै राप्रपा प्रजातान्त्रिकका सांसद अब संसद्मा सत्तापक्ष बेन्चमा बस्नेछन् । यसअघि पार्टी केन्द्रीय समिति बैठकले सरकारलाई समर्थन र सहयोग निरन्तर गर्ने निर्णय गरिसकेकाले राप्रपा प्रजातान्त्रिक सत्तापक्ष भएको गिरीले जानकारी दिए ।