काठमाडौं : हरेक फुटबल स्पर्धाको फाइनलमा भारत तगारो बन्दै आएको दृष्टान्त यसपटक पनि दोहोरिएको छ । यू–१५ साफ च्याम्पियनसिप फुटबलको आइतबार भएको फाइनलमा भारतले नेपाललाई २–१ गोलले हराउँदै उपाधि हात पारेको छ । एन्फा टेक्निकल मैदान ललितपुरमा परिचित प्रतिद्वन्द्वी भारतसँग नेपालले सुरुआती अग्रता लिएर पनि त्यसलाई जोगाउन सकेन ।
नेपालले ४१औं मिनेटमा बृजेस चौधरीको पेनाल्टी गोलमार्फत गोल गरेको थियो । डिबक्सभित्र भारतका मोइराङ्थेम थोइबा सिंहले नेपालका रञ्जन पुनलाई फल गरेपछि नेपालले पेनाल्टीको अवसर पाएको थियो । पहिलो हाफमा थप दुईवटा गोलको अवसर खेल फालेको नेपाल दोस्रो हाफमा भने निरिह देखियो । दोस्रो हाफमा खेलमा फर्किएको भारतले ५९औं मिनेटमा बराबरी गोल फर्कायो । भारतका लागि लाल रोकिमाले बराबरी गोल गरे । ४८ औं मिनेटमा रविबहादुर रानाको स्थानमा मैदान छिरेका लाल रोकिमाले डिबक्स छेउबाट गोल गरेका थिए ।
यसैगरी ७५औं मिनेटमा भारतका कप्तान विक्रमप्रताप सिंहले डिबक्सभित्र नेपालका चारजना रक्षकलाई छल्दै प्रहार गरेको ग्रास सटले सोझै जाली चुमेपछि नेपाल हार खेप्न बाध्य बन्यो ।
समुहगत चरणको खेलमा पनि नेपाल भारतसँग २–१ गोलले नै पराजित भएको थियो । यसैगरी तेस्रो स्थानका लागि हल्चोकस्थित एपीएफको मैदानमा भएको खेलमा बंगलादेशले भुटानलाई ८–० गोलले हरायो ।
प्रतियोगितामा उत्कृष्ट खेलाडीको पुरस्कार भारतका कप्तान विक्रमप्रताप सिंहले पाए । सर्वाधिक गोलकत्र्ताको पुरस्कार बंगलादेशका मोहमद फैजल रहिमले पाए । उनले खेलभर सातवटा गोल गरेका थिए । फेयर प्ले टोलीको उपाधि बंगलादेशले हात पार्यो ।
प्रतिक्रिया दिनुहोस !
