अमेरिकी धम्कीपछि भेनेजुएलाका नागरिक सैनिक तालिम लिँदै

काराकस : भेनेजुएलाका नागरिकले अमेरिकाले लगाएको आर्थिक प्रतिबन्धको विरोधमा सडकमा प्रदर्शन गरेका छन् । अमेरिकाले मानवअधिकार उल्लंघन भएको भन्दै शनिबार भेनेजुएलामाथि प्रतिबन्ध लगाएको थियो ।

अमेरिकी सरकारको कदमको विरोधमा सर्वसाधारण नागरिकले आफूहरूलाई पनि सेनाको तालिम दिन आग्रह गरेका छन् । उनीहरूको आग्रहपछि यहाँको सेनाले सर्वसाधारणलाई पनि राइफल चलाउन, क्षेप्यास्त्र प्रयोग गर्न र भिडन्त गर्ने प्रशिक्षण दिन शुरु गरेको छ । शनिबारदेखि शुरु गरिएको सैन्य अभ्यासमा युद्धक विमान, ट्यांक र नेशनल बोलिभियन आर्मीका जवानले एकसाथ प्रदर्शन गरिरहेका छन् । सैन्य अभ्यासमा दुई लाख सैनिक र सात लाख जगेडा सुरक्षा बलसहित सर्वसाधारण सहभागी छन् ।

प्रदर्शनकारीहरूले अमेरिकी सरकारको अतिक्रमणलाई अस्वीकार गर्ने ‘युनाइटेड सोसिलिस्ट पार्टी अफ भेनेजुएला (पीएसयुभी)’ का नेता दारियो भिभासले एक टेलिभिजनमा बताएका छन् । यसैबीच भेनेजुएलाको सरकारले सर्वसाधारणलाई सैन्य तालिम दिन शुरु गरेको छ । सरकारले देशभर सैन्य तालिम शुरु गरी अभ्यास आयोजना गर्दै हजारौं सर्वसाधारणलाई बन्दुक चलाउन सिकाएको छ ।

सरकारले दुई लाख सैनिक र सात लाख सर्वसाधारण र आवश्यकताअनुसार फौजी जिम्मेवारीमा तैनाथ गर्न सकिने व्यक्तिहरूलाई उक्त तालिममा तैनाथ गरिएको छ । अमेरिकाले निकोलस मदुरो सरकारमाथि मानवअधिकार उल्लंघन गरेको आरोप लगाउँदै दबाव बढाएपछि उक्त सैन्य अभ्यास आयोजना गरिएको हो । राजधानी काराकस र भेनेजुएलाका अन्य शहरमा आधारभूत सैन्य गतिविधिबारे सर्वसाधारणलाई तालिम दिइएको थियो ।

काराकसस्थित सैन्य प्रशिक्षण केन्द्रले मुक्का प्रहार गर्न, युद्धक विमान खसाल्न र बन्दुक चलाउन सिकाएको जानकारी दिएको छ । राइफल प्रहार गर्ने प्रशिक्षण लिएपछि ६० वर्षीया महिला एरिका एभेनदानोले भनिन्, ‘याङ्किज आउट ।’ भेनेजुएलामा अमेरिकाले कुनै कदम चाले आफूहरूले त्यसको सशक्त प्रतिकार गर्ने स्पष्ट पारिन् । सेनाबाट बन्दुक चलाउन सिक्दै गरेका २३ वर्षीय ग्रेगोरियो भल्देरामाले भने, ‘आफ्नो देश र परिवारको रक्षा गर्न सिक्दै छु । मलाई राइफल चलाउन र गोली प्रहार गर्न आउँदैन । अब म सिक्दै छु ।’