बन्धक बनाएर गहना लुटपाट

जितपुर : लुटेरा समूहले बाराको जितपुरका शिवजी सोनारको घरबाट सोमबार राति १८ तोला सुन लुटपाट गरेको छ । जीतपुरसिमरा उपमहानगरपालिका–७ स्थित ब्यस्त बजारमा रहेको सोनारको घरमा प्रवेश गर्दै ६ जनाको संख्यामा रहेको समूहले सोनारका पत्नी उर्मिलादेवी र छोरी लक्ष्मीलाई डोरीले बाधेर गहना र मोबाइल लुटपाट गरि फरार भएको हो ।

 

सोनार राष्ट्रिय जनता पार्टीका नगर संयोजक हुन् । जीतपुरमा भइरहेको गणेश चतुर्थी मेलाका संयोजक समेत रहेका सोनार घरमा नभएको मौका पारेर लुटेरा समूह घरमा पसेको थियो । सोनार मेलाका लागि राति ८.३० बजे निस्किएको १५ मिनेटपछि लुटेरा समूह घरमा प्रवेश गरेको परिवारको भनाई छ।

घरेलु हातहतियारसहित भित्र प्रवेश गरेका लुटेराले उर्मिलादेवी र लक्ष्मीलाई डोरीले बाँधेर मुखमा टेप लगाउदै बन्धक बनाएर सुनको हार र मोबाइल लुटेको थियो। लुटेरा समूहले हिन्दीमा कुरा गरेको उर्मिलादेवीले बताइन् ।

गहना लुटेलगत्तै सो समूह जीतपुर चोकमा रोकिराखिएको स्कोरपियो चढेर वीरगन्जतर्फ भागेका छन् । बजारमा गाडी तयारी अवस्थामा राखेर लुटेरा समूह घरभित्र प्रवेश गरेको देखिएको इलाका प्रहरी कार्यलय सिमराका प्रहरी निरीक्षक गोविन्दकुमार कार्कीले जानकारी दिए । जीतपुरबजारमा रहेको सिसिटिभीमा लुटेरा भागेको दृश्य कैद भएपनि अध्यारो भएका कारण बुझ्न कठिन भइरहेको प्रहरी निरीक्षक कार्कीले बताए । घटनालगत्तै प्रहरीले अनुसन्धान सुरु गरिसेकेको भन्दै कार्कीले लुटेराको खोजी भइरहेको बताए ।