दुवाकोटा (भक्तपुर) ‘दैनिक एउटा भेडा हराउन थालेपछि गोठालाहरुले रहस्य खोजे । उनीहरुले थुम्कोमा रगतको छिटाहरु फेला पारे । त्यहि रगत भेटिएको ठाउँमा खनेर हेर्दा गणेशको सुड भेटिएछ । नेवारी भाषामा फै भनेको भेडा हुन्छ । त्यहि वेलादेखि फैटोका गणेशको नाम राखिएको रहेछ’ भक्तपुरको चाँगुनारायण नगरपालिका वडा नम्बर २ स्थित कित्ता नम्बर ३९ (१) ग (२) रहेको रमणीय थुम्कोमा गणेश मन्दिरको इतिहास खोले मन्दिर संरक्षण समितिका अध्यक्ष श्याम प्रधानले ।
प्रधानका अनुसार नौ फिट लम्बाई नौ फिट चौडाई भएको करीव २५ फिट अग्लो प्यागोडा शेलीमा निर्मित गणेश मन्दिर मल्लकालीन हुन सक्ने अनुमान गरिन्छ । ०७२ बैशाख १२ गतेको बिनाशकारी भुकम्प र त्यसपछि आएका पराकम्पले सो मन्दिरलाई पनि बाँकी राखेन । ०७३ मंसिर २६ गतेदेखि ज्योतिष बिधि अनुसार पूजा गरी मन्दिरलाई पूरानै शैलीमा पुननिर्माण गर्न थालिएको छ ।
स्वामी गोरखनाथ र कमलनयनाचार्यबाट ०७१ फागुन २५ उदघाटन गराइएको महायज्ञबाट संकलन भएको नगद तथा जिन्सी गरी करीव २५ लाख रुपैयाले अहिले पुननिर्माण भइरहेको प्रधानले बताए । त्यहि वेलादेखि सर्वसिद्धी फैटोका गणेशको नामाकरण गरिएको हो ।
मन्दिर परिसरलाई धार्मिक र पर्यटकीय क्षेत्रको रुपमा विकास गर्ने लक्ष्य राखिएको छ । बनभोजस्थलका लागि समेत उपयोगी सो स्थान रमणीय पनि छ । 
थुम्कोको सीमा संरक्षण घेरा लगाएर रमणीय मन्दिरलाई आकर्षक बनाउन लागिएको प्रधानले बताए । सर्वसिद्धी फैटोका गणेश संरक्षण समितिका अध्यक्ष प्रधानले मनको इच्छा पूरा गर्ने बिश्वास गरिएको मन्दिरको संरक्षण र विकासका लागि सबै पक्षसँग सहयोगका लागि अपिल गरेका छन् ।
भक्तपुरको सल्लाघारीबाट उत्तरतिर दुईकिलोमिटर अगाडि बढेपछि मनको इच्छा पूरा गर्ने बिश्वास गरिएको फैटोका गणेश मन्दिरमा पुग्न सकिन्छ ।
पुजारी शंकर श्रेष्ठका अनुसार भक्तजनहरुको आकर्षण बढदै गएको छ । उनले भने ‘पहिले भन्दा धेरै भक्तजन आउने गर्छन ।’
प्रतिक्रिया दिनुहोस !
