मोटरसाइकल दुर्घटना हुँदा दुई सहसेनानीसहित तीन घाइते
पथलैया : बाराको अमलेखगञ्जमा मंगलबार साँझ टाटा सुमोले मोटरसाइकललाई ठक्कर दिँदा नेपाली सेनाका दुई अधिकृतसहित तीन गम्भीर घाइते भएका छन् ।वीरगंजबाट हेटौँडा तर्फ हिँडेको ना १ ज १९२० नम्बरको टाटासुमोले विपरित दिशाबाट आउँदै गरेको बा ५० प ९४६४ नम्बरको मोटरसाइकललाई ठक्कर दिँदा अमलेखगन्जस्थित नेपाली सेनाको सैनिक शिक्षालयमा कार्यरत सह सेनानीद्वय ललितपुरका वीरेन्द्र राउत र सिन्धुली कपिलाकोटका मनोजकुमार थापा घाइते भएका हुन् ।
दुर्घटनामा टाटासुमोमा सवार यात्रु मकवानपुर बसामाडीका बलराम सुनार समेत घाइते भएको इलाका प्रहरी कार्यालय सिमराका प्रहरी निरीक्षक गोविन्द कार्कीले जानकारी दिए ।
घाइते सबैको हेटौंडास्थित चुरेहिल अस्पतालमा उपचार भइरहेको छ । घाइतेमध्ये दुबै सहसेनानीको अवस्था गम्भीर रहेको प्रहरीले जनाएको छ । घटनापछि टाटासुमोका चालक फरार भएका छन् । मोटरसाइकल र सुमोलाई प्रहरीले नियन्त्रणमा राखेको छ ।
प्रतिक्रिया दिनुहोस !
