विराटनगर उडान अझै प्रभावित

 विराटनगर : साउन अन्तिम साता आएको बाढीका कारण प्रभावित विराटनगर विमानस्थल अझै पनि पूर्ण रूपमा सञ्चालनमा आउन सकेको छैन । बाढीले अवरुद्ध विमानस्थल एक सातापछि सञ्चालनमा आए पनि पूर्ण उडान गर्न अझै समस्या छ । दिवा उडान मात्र गर्न मिल्ने विमानस्थलमा नाइट तथा लो भिजिबिलिटीमा उडान अनुमति नभएको सेवा प्रदायक कम्पनीले बताएका छन् । दैनिक १५ वटासम्म उडान हुने विमानस्थलमा अहिले बढीमा आठवटा मात्र हुने गरेका छन् ।

काठमाडौंपछि विराटनगरलाई बढी यात्रु चाप हुने विमानस्थलका रूपमा लिइन्छ । निजी हवाई सेवाप्रदायक कम्पनीका प्रतिनिधिले भने सरकारी हेलचेक्र्याइँका कारण विमान सञ्चालनमा समस्या भएको आरोप लगाएका छन् । जिम्मेवार निकायको हेलचेक्र्याइँका कारण यात्रु र निजी एयरलाइन्स कम्पनीलाई दुःख भएको सौर्य एयरलायन्सका विराटनगर विमानस्थल स्टेसन इन्चार्ज प्रकाश पौडेलले बताए । ‘दसैंतिहारजस्ता चाडपर्व नजिकिएका छन्', उनले भने, ‘दैनिक उडानमा चाप हुने समयमा सरकारी पक्षबाट यति धेरै समय धावनमार्गको मर्मत गर्न नसक्नु दुःखद विषय हो ।' विमानस्थलमा जमेको धुलो र हिलो सफा गरिसकिएको छैन । ट्याक्सी स्ट्यान्ड र डिपार्चर हलसम्म पुग्ने स्थान पनि धुलाम्मे छ ।

दैनिक १५ वटासम्म उडान हुने विमानस्थलमा अहिले बढीमा आठवटा मात्र हुने गरेका छन् ।

बाढीले जहाजलाई संकेत दिन मिल्ने धावनमार्गका लाइट र उपकरणमा क्षति पुर्यापएपछि रात्रिकालीन उडान र लो भिजिबिलिटी हुने मौसमका उडान बन्द भएका छन् । त्यसैले अहिले दिउँसो पूर्ण उज्यालोमा मात्र जहाज उडान र अवतरण गर्ने अनुमति छ । विमानस्थल प्रशासनले भने धावनमार्गमा क्षति भएका धेरैजसो लाइट काम नलाग्ने गरी बिग्रिएकाले विदेशबाट मगाइएको जानकारी दिएको छ । ‘स्वदेशमा उपलब्ध हुन नसकेपछि हामीले विदेशबाट केही लाइट र उपकरण मगाएका छौं', विराटनगर विमानस्थलका प्रवक्ता सन्तोष ढकालले भने, ‘हामी दसैंअगावै काम सम्पन्न गर्ने तयारीमा जुटेका छौं ।'

विमानस्थल व्यवस्थापनका लागि दु्रत गतिमा काम अघि बढाइएको उनको भनाइ छ । विमानस्थलमा अहिले पनि यात्रु जाँदा मास्क लगाउनुपर्ने बाध्यता रहेका कारण विमानस्थल क्षेत्रको फोहोर तथा धुलो हटाउने काम जारी रहेको उनले बताए ।