चार वर्षमा पनि आएन बिजुली

मंगलसेन : अछामको कैलाशखोलास्थित अछाम साना जलविद्युत् केन्द्रको नहर भत्किएको चार वर्ष बितिसक्दा पनि विद्युत् उत्पादन अझै सुचारु हुन सकेको छैन ।चार वर्षअघि २०७० भदौ ७ गते राति भत्किएको विद्युत्को नहर मर्मतको काम सकिएको छ ।

ढिलै भए पनि भत्किएको नहर र टर्बाइनसमेत मर्मत भएर विद्युत् उत्पादन हुने अवस्थामा पनि सुचारु हुन नसकेको हो । चार सय किलोवाट क्षमाताको आयोजनाबाट उत्पादित विद्युत् यसअघि सदरमुकाम मंगलसेन, साँफेबगरलगायत आसपासका क्षेत्रमा वितरण गरिएकोमा अब भने त्यसलाई राष्ट्रिय प्रसारण लाइनमा जोड्नुपर्नेछ ।

कर्मचारी अभाव र राष्ट्रिय प्रसारण लाइनमा जोड्न सिन्कोमाइजर नामक उपकरण अभावमा विद्युत् उत्पादन सुचारु गर्न नसकिएको नेपाल विद्युत् प्राधिकरण अछाम वितरण केन्द्रका प्रमुख रोशनकुमार ठाकुरले जानकारी दिए । ‘गत असारमै नहर र टर्बाइन मर्मतको काम सम्पन्न भइसकेको हो । तर पनि उत्पादित विद्युत्लाई राष्ट्रिय प्रसारण केन्द्रमा जोड्न आवश्यक उपकरण र कर्मचारी अभावका कारण समस्या थपिएको हो', ठाकुरले भने, ‘आवश्यक नयाँ दरबन्दी सिर्जना गर्नुपर्ने र उपकरण खरिद गर्न क्षेत्रीय कार्यालयलाई जानकारी गराइसकिएको छ ।'

पुरानो विद्युत् वितरणको समयमा २८ कर्मचारीको दरबन्दी भए पनि हाल विद्युत् विस्तारको काम बढेकाले कैलाशखोला जलविद्युत् आयोजना सुचारु गर्न थप ८/९ कर्मचारी आवश्यक रहेको ठाकुरले जानकारी दिए । नहर भत्किएको करिब एक महिनाभित्र मर्मत कार्य सम्पन्न हुने भनिए पनि कार्यालयको बेवास्ताका कारण करिब ९ महिनासम्म मर्मत प्रक्रिया सुरु हुन सकेन ।

चार वर्षअघि २०७० भदौ ७ गते राति भत्किएको विद्युत्को नहर मर्मतको काम सकिएको छ ।

समयमै नहर मर्मतको काम सम्पन्न नहुँदाजिल्लावासीले राष्ट्रिय प्रसारणलाइनको लामो लोडसेडिङको मार खेप्नुपरेको छ । साथै आयोजना सञ्चालन नहुँदा मेसिनमा खिया लागेको छ । पुरानो मेसिन भएका कारण मेसिनमा खिया लागेको हो । २०५३ सालमा निर्माण सकिएको विद्युत्को नहर मर्मतसम्भार नगर्दा पूरै जीर्ण बनेको छ । नहरका साथै मेसिनसमेत पुरानो भएकाले ठाउँठाउँबाट पानी चुहिन्छ । २०५८ सालमा तत्कालीन विद्रोही माओवादीले बम विस्फोटन गरी विद्युत् केन्द्र ध्वस्त बनाएको थियो ।

नहर भत्किनुअघि साविक १६ गाविसका दुई हजार आठ सय ५५ उपभोक्ताले विद्युत् सेवा पाएका थिए । यसबाट मासिक १२ लाख रुपैयाँभन्दा बढी विद्युत् महसुल संकलन हुँदै आएको प्राधिकरण अछाम वितरण केन्द्रले जानकारी दिएको छ । चार वर्षसम्म विद्युत् अवरुद्ध हुँदा करिब पौने ६ करोड रुपैयाँ गुमेको छ।