‘लगानीको वातावरण बनेको छ'

काठमाडौं : नेपाल उद्योग वाणिज्य महासंघ र विश्व श्रम संगठन (आईएलओ) को प्रतिनिधिमण्डलबीच भेटवार्ता भएको छ । आईएलओको नेपालका लागि देशिय निर्देशक डा. रिचार्ड हवार्डको नेतृत्वको प्रतिनिधिमण्डलसँग मंगलबार महासंघ सचिवालयमा भेटवार्ता भएको हो ।

 

महासंघका वरिष्ठ उपाध्यक्ष शेखर गोल्छाले नेपालमा सबै प्रकारको अस्थिरताको विस्तारै अन्त्य हुँदै गएको आईएलओ प्रतिनिधिमण्डललाई जानकारी गराए । ‘निजी क्षेत्रले धेरै समयदेखि माग गर्दै आएका ऐन कानुन पास हुँदै छन्, लोडसेडिङको अन्त्य र स्थानीय निकायको चुनाव पनि सम्पन्न भइसकेको छ', उनले भने, ‘यसले मुलुकमा लगानीको वातावरण बनाइदिएको छ ।'

रोजगारदाता र ट्रेड युनियनको संयुक्त सहकार्य र सहमतिमा आएको श्रम ऐन, सामाजिक सुरक्षा ऐन महत्ववपूर्ण रहेको बताउँदै वरिष्ठ उपाध्यक्ष गोल्छाले यसको प्रभावकारी कार्यान्वयनमार्फत मुलुकभित्र आर्थिक विकास र रोजगारी सिर्जना गर्ने महत्ववपूर्ण अवसर आएको बताए ।

महासंघको रोजगारदाता परिषद्का सभापति एवं उपाध्यक्ष चन्द्रप्रसाद ढकालले नेपालमा धेरै क्षेत्रमा काम गरेर रोजगारीका अवसर सिर्जना गर्न सकिने उदाहरण प्रस्तुत गरे । नयाँ श्रम ऐन र सामाजिक सुरक्षा ऐन औद्योगिक विकासको महत्ववपूर्ण औजार हुने उनको विश्वास छ । उनले रोजगारदाता र ट्रेड यूनियनको सहकार्यमा आएको श्रम ऐन र सामाजिक सुरक्षा ऐन प्रभावकारी ढंगमा कार्यान्वयन हुनेमा निजी क्षेत्र विश्वस्त रहेको जानकारी गराए ।

आईएलओका देशिय निर्देशक डा.रिचार्डले नयाँ श्रम ऐन र सामाजिक सुरक्षा ऐन नेपालको आर्थिक विकास, रोजगारी सिर्जना एवं रोजगारदाता तथा ट्रेड युनियनबीचको सम्बन्ध थप मजवुद बनाउन महत्ववपूर्ण कडी हुने विश्वास व्यक्त गरे । उनले महासंघको रोजगारदाता परिषद्लाई अझ बढी सशक्त ढंगबाट अगाडि बढाउन र परिषद्मार्फत उद्यमशीलता विकास तथा आवश्यक प्राविधिक सहयोग गर्न आईएलओ तयार रहेको विश्वास दिलाए ।

टिममा सहभागी आईएलओ प्रतिनिधिले श्रम ऐन र सामाजिक सुरक्षा ऐनमा भएको प्रावधान, रोजगारदाता ट्रेड युनियनबीचको सहकार्य, महासंघको विद्यमान सञ्जाल तथा कार्य योजना, आगामी आपसी सहयोगका विषयमा जिज्ञासा राखेका थिए ।