रुसी टेनिस सुन्दरीको उत्कृष्ट पुनरागमन
न्युयोर्क : रुसी टेनिस सुन्दरी मारिया सारापोभाले ग्रान्डस्लाम प्रतियोगितामा उत्कृष्ट पुनरागमन गरेकी छन् । यूएस ओपनको मंगलबार खेलिएको महिला एकलतर्फको पहिलो चरणको खेलमा सारापोभाले विश्व नम्बर २ वरीयतामा रहेकी रोमानियन खेलाडी सिमोना हालेपलाई ६-४, ४-६, ६-३ अंकले पाखा लगाइन् । उक्त खेल हेर्न करिब २४ हजार दर्शक उपस्थित थिए ।
प्रतिबन्धित शक्तिवद्र्धक औषधि सेवन गरेको आरोपमा १५ महिना लामो प्रतिबन्ध भोगेर कोर्टमा फर्किएयता ३० वर्षीया सारापोभाले खेलेको यो पहिलो ग्रान्डस्लाम प्रतियोगिता हो । सन् २००६ को यूएस ओपन च्याम्पियन सारापोभाले वाइल्ड कार्डमार्फत प्रतियोगितामा सहभागिता जनाएकी हुन् । उनी पूर्वविश्व नम्बर १ खेलाडी पनि हुन् । हालेपलाई हराउन सारापोभाले दुई घन्टा ४४ मिनेट समय खर्चिइन् । हालेपविरुद्घ हालसम्म खेलिएका सातवटै खेलमा सारापोभाले जित हात पारेकी छन् । उनले अब दोस्रो चरणमा हंगेरीकी टिमिया बाबोससँग प्रतिस्पर्धा गर्नेछिन् ।
सारापोभासँगै स्पेनकी गार्बिन मुगुरुजा, डेनमार्ककी क्यारोलिन वजनिएस्की र अमेरिकाकी भेनस विलियम्स पनि आआफ्ना प्रतिद्वन्द्वीलाई पाखा लगाउँदै प्रतियोगिताको दोस्रो चरणमा पुगेका छन् । तेस्रो वरीयताकी मुगुरुजाले अमेरिकाकी भार्भरा लेप्चेन्कोलाई ६-०, ६-३ र पाँचौं वरीयताकी वजनिएस्कीले रोमानियाकी मिहेला बुजार्नेस्कुलाई ६-१, ७-५ अंकले हराए । नवौं वरीयताकी अनुभवी खेलाडी भेनसले स्लोभाकियाकी भिक्टोरिया कुजमोभालाई ६-३, ३-६, ६-२ ले पाखा लगाइन्।
ब्रिटेनकी योहाना कोन्टा र हेथर वाट्सन तथा सर्बियाकी एलेना यान्कोभिच भने पहिलो चरणको खेलमै पराजित भएका छन् । सातौं वरीयतामा आसीन प्रभावशाली खेलाडी कोन्टालाई सर्बियाकी एलेक्जेन्ड्रा क्रुनिचले ४-६, ६-३, ६-४ ले हराइन् । चेक गणतन्त्रकी पेत्रा भितोभाले यान्कोभिचलाई ७-५, ७-५ को सोझो सेटमा पाखा लगाइन् । रुसकी एकातेरिना माकारोभा, स्पेनकी कार्ला स्वारेज नाभारो, फ्रान्सकी क्लोरोलिन गार्सिया, जर्मनीकी जुलिया जर्जेस र चीनकी पेङ सुई भने प्रतियोगिताको दोस्रो चरणमा पुग्न सफल भए ।
यसैगरी पुरुष एकलतर्फ क्रोएसियाका मारिन सिलिच, अमेरिकाका जोन इस्नर र साम क्वेरी तथा अस्ट्रेलियाका जोर्डन थम्पसन दोस्रो चरणमा पुगे । अमेरिकाका ज्याक सक, नेदरल्यान्ड्सका रोविन हास र स्पेनका डेभिड फेरर भने पहिलो चरणमै पराजित भए । लग्जम्बर्गका गिल्स मुल्लर, दक्षिण अफ्रिकाका केभिन एन्डर्सन र फ्रान्सका जो विल्फ्राइड सोंगा भने दोस्रो चरणमा प्रवेश गर्न सफल भए।