जीवन बिमा कम्पनीको नाफा घट्यो

काठमाडौं : जीवन बिमा कम्पनीहरूको नाफा घटेको छ । आर्थिक वर्ष २०७३/७४ मा जीवन बिमा कम्पनीको नाफा ४१.५ प्रतिशत घटेर एक अर्ब ३१ करोड ९८ लाख रुपैयाँमा सीमित भएको छ । अघिल्लो वर्ष जीवन बिमा कम्पनीले दुई अर्ब २५ करोड ८६ लाख रुपैयाँ नाफा गरेका थिए । ठूला कम्पनीको नाफा घटेका कारण समग्र नाफामा गिरावट आएको हो ।

नेपाल लाइफ इन्सुरेन्सका प्रमुख कार्यकारी अधिकृत विवेक झाले बिमा कम्पनीको यो नाफा अपरिस्कृत भएको बताए । ‘नाफाको यथार्थ मूल्यांकन प्रतिवेदन आउन बाँकी छ । अहिले बिमा कम्पनीले कमाएको नाफा अपरिस्कृत तथ्यांक हो', झाले भने,‘ लेखा परीक्षणपछि जीवन बिमा कोषबाट आएको रकम समावेश गरी यथार्थ नाफा आउँछ ।'

उनका अनुसार अहिले प्रकाशित भएको र गएको वर्षभन्दा नाफा घटेका देखिएका कम्पनीको वित्तीय विवरणमा बिमांक मूल्यांकनको नाफा समावेश भएको छैन । उनले थपे, ‘यो रकम जोडेपछि सबै बिमा कम्पनीको नाफा बढ्छ, यसमा प्रमुख नाफा त जोडिनै बाँकी छ ।' अबको दुई तीन महिनापछि मात्र बिमा कम्पनीको वास्तविक नाफा कति थाहा हुने उनको भनाइ छ ।

अपरिस्कृत तथ्यांकअनुसार नेसनल लाइफ इन्सुरेन्स, नेपाल लाइफ इन्सुरेन्स र अमेरिकन लाइफ इन्सुरेन्सको नाफा घटेको छ । सूर्या, सिद्धार्थ, गुराँस, एसिएन, प्राइम र नेसनल लाइफ इन्सुरेन्सको नाफा बढेको देखिएको छ ।

नेपाल लाइफ इन्सुरेन्स

नेपाल लाइफ इन्सुरेन्सले गत आवमा ४१ करोड ६५ लाख रुपैयाँ नाफा कमाएको छ । यो बिमा कम्पनीले यस वर्षको बिमांकीय मूल्यांकन गर्न बाँकी रहेको र त्यसपछि हुने नाफा पनि यसमा जोडिने जानकारी सीईओ झाले दिएका छन् । यो बिमा कम्पनीले अघिल्लो वर्ष ९० करोड ६६ लाख नाफा गरेको थियो । यो नाफा बिमांकीय मूल्यांकन पश्चात प्राप्त भएको ५७ करोड ८९ लाख रुपैयाँको नाफासमेत जोडेर राखिएको अन्तिम तथ्यांक हो ।

ठूला कम्पनीको नाफा घटेका कारण समग्र नाफामा गिरावट आएको हो ।

यो बिमा कम्पनीको गत आवसम्ममा तीन अर्ब नौ करोड रुपैयाँ छ । यसले जगेडा कोषमा चार अर्ब ७४ करोड रुपैयाँ जम्मा गरेको छ । यो बिमा कम्पनीले बिमा शुल्कमार्फत १२ अर्ब रुपैयाँ संकलन गरेको छ । यसले अभिकर्ता कमिसनमा एक अर्ब २२ करोड खर्च गरेको छ । यसले बिमा शुल्कमार्फत गत आवसम्ममा ५२ अर्ब ३७ करोड रुपैयाँ संकलन गरेको छ । गत आवमा मात्रै १२ अर्ब २१ करोड रुपैयाँ बिमा शुल्क संकलन गरेको छ । यो बिमा कम्पनीको प्रतिसेयर आम्दानी १३ रुपैयाँ ४५ पैसा छ । यसको प्रतिसेयर नेटवर्थ २६० रुपैयाँ ३६ पैसा रहेको छ ।

सूर्या लाइफ इन्स्योरेन्स

सूर्या लाइफ इन्सुरेन्सले गत आर्थिक वर्ष नौ करोड ६९ लाख रुपैयाँ खुद नाफा कमाएको छ । यो बिमा कम्पनीले अघिल्लो वर्ष आठ करोड ३९ लाख रुपैयाँ यस्तो नाफा कमाएको थियो । यो कम्पनीको चुक्ता पुँजी ६५ करोड ६२ लाख रुपैयाँ छ । यसको जगेडा कोषमा ३२ करोड ४६ लाख र जीवन बिमा कोषमा दुई अर्ब ४३ करोड रुपैयाँ छ ।

यसले गत आवसम्ममा एक अर्ब ३३ करोड रुपैयाँ शुल्कमार्फत आर्जन गरेको छ । कम्पनीको बिमालेख संख्या आठ लाख आठ हजार छ । यसको बोनस दर प्रतिहजार ३५ देखि ७० रुपैयाँसम्म छ । प्रतिसेयर आम्दानी १४ रुपैयाँ ७८ पैसा र प्रतिसेयर नेटवर्थ एक सय ५४ रुपैयाँ ६९ पैसा छ ।

नेसनल लाइफ इन्सुरेन्स

नेसनल लाइफ इन्सुरेन्सले गत आवमा २३ करोड ५५ लाख रुपैयाँ खुद नाफा गरेको छ । यो बिमा कम्पनीले अघिल्लो वर्ष १६ करोड ९५ लाख रुपैयाँ गरेको नाफा थियो । यो बिमा कम्पनीको चुक्ता पुँजी एक अर्ब ३२ करोड रुपैयाँ छ । यसको जगेडा कोषमा ६१ करोड ३१ लाख रुपैयाँ छ भने जीबन बिमा कोषमा १७ अर्ब ३७ करोड रुपैयाँ छ ।

यो बिमा कम्पनीले गत आवसम्ममा चार अर्ब ९७ करोड रुपैयाँ बिमा शुल्क आर्जन गरेको छ । यसको बिमालेख संख्या आठ लाख ७५ हजार ९१ रहेको छ । बोनस दर ६१ देखि ८० रुपैयाँसम्म छ । यसको प्रतिसेयर आम्दानी १७ रुपैयाँ ७८ पैसा र प्रतिसेयर नेटवर्थ १५३ रुपैयाँ ४५ पैसा छ ।

लाइफ इन्सुरेनस कर्पोरेसन

लाइफ इन्सुरेनस कर्पोरेसनले गत वर्ष ११ करोड ६७ लाख रुपैयाँ खुद मुनाफा गरेको छ । यो बिमा कम्पनीले अघिल्लो वर्ष ३२ करोड १४ लाख रुपैयाँ नाफा गरेको थियो । यसले कुल बिमा शुल्कमार्फत आठ अर्ब ७० करोड रुपैयाँ संकलन गरेको छ । कम्पनीका बिमालेख संख्या ६ लाख ६८ हजार एक सय ३८ वटा छन् । यसको घोषित मुनाफा दर (बोनस) ६१ देखि ७५ रुपैयाँसम्म छ । यसको चुक्ता पुँजी अर्ब ३३ करोड रुपैयाँ छ । यसले जीवन बिमा कोषमा ३३ अर्ब ८९ करोड रुपैयाँ र जगेडा कोषमा दुई अर्ब ६० करोड रुपैयाँ राखेको छ । यो बिमा कम्पनीको प्रतिसेयर आम्दानी आठ रुपैयाँ ७५ पैसा छ । प्रतिसेयर नेटवर्थ एक सय २६ रुपैयाँ ५ पैसा रहेको उल्लेख छ ।

अमेरिकन लाइफ इन्सुरेन्स

अमेरिकन लाइफ इन्सुरेनस मेटा लाइफको नाफा ५२.४३ प्रतिशत घटेको छ । यो जीवन बिमा कम्पनीको नाफा गत आवमा २२ करोड २४ लाख रुपैयाँ मात्रै छ । यसको नाफा अघिल्लो वर्ष ३३ करोड ९० लाख रुपैयाँ थियो । अघिल्लो वर्षको तुलनामा गत आवमा यो नाफा ११ करोड ६६ लाख रुपैयाँ कम हो । यसको जीवन बिमाकोषमा १३ अर्ब २२ करोड रुपैयाँ छ भने जगेडा कोषमा एक अर्ब नौ करोड रुपैयाँ छ । यो बिमा कम्पनीको कुल बिमाशुल्क आम्दानी तीन अर्ब आठ करोड छ । यसले सात लाख ६७ हजार बिमालेख जारी गरेको छ । यो बिमा कम्पनीले अन्तिम लेखा परीक्षण नभएको र यो पनि नाफा परिवर्तन हुन सक्ने बताएको छ ।

गुराँस लाइफ इन्सुरेन्स

गत आवमा गुराँसले तीन करोड १० लाख रुपैयाँ खुद नाफा गरेको छ । अघिल्लो वर्षको सोही अवधिमा उसको खुदनाफा दुई करोड ६६ लाख रुपैयाँ मात्र थियो । गुराँसले सार्वजनिक गरेको गत आवको अपरिस्कृत वित्तीय विवरणअनुसार बिमाशुल्क आम्दानी २४.५८ प्रतिशत बढेर एक अर्ब २१ करोड रुपैयाँ पुगेको छ । अघिल्लो वर्ष कम्पनीले ९७ करोड रुपैयाँमात्र बिमा शुल्क आर्जन गरेको थियो । हालसम्म कुल बिमाशुल्क आर्जन चार अर्ब ३४ करोड रुपैयाँ पुगेको छ ।

कुल दाबी भुक्तानी रकम २८ करोड ३९ लाख रुपैयाँ भएकामा गत आवसम्म १५ करोड ६३ लाख रुपैयाँ दाबी भुत्तानी गरेको कम्पनीले जनाएको छ । हालसम्म एक लाख ६२ हजार आठ सय १३ बिमालेख जारी गरेको छ । कम्पनीको प्रतिसेयर आम्दानी पाँच रुपैयाँ २३ पैसा छ । एसियन तथा प्राइम लाइफ इन्सुरेन्सले पनि अघिल्लो वर्षको तुलनामा नाफा बढाएका छन् । राष्ट्रिय बिमा संस्थानले अघिल्लो वर्षदेखि लेखा परीक्षण नगरेकाले गएको वर्षको समेत वित्तीय विवरण सार्वजनिक गर्न सकेको छैन ।