काठमाडौं : माओवादी केन्द्रले पार्टीको सर्वाेच्च निकाय केन्द्रीय सचिवालय बैठक वीरगन्जमा गर्ने भएको छ । भदौ १७ गते आयोजना हुने बैठकका लागि उसले सबै शीर्ष नेतालाई मधेस बोलाएको छ ।
यसअघि उक्त बैठक काठमाडौंमा बोलाइए पनि बुधबार मात्रै स्थान सारेर वीरगन्ज पुर्याइएको हो । पार्टीको सर्वोच्च संरचना ‘हेडक्वार्टर' विघटन गरी सचिवालयलाई नै सर्वोच्च कार्यकारी संरचना बनाएपछि माओवादीले पहिलो बैठक मधेसमा गर्न लागेको हो ।
दुई नम्बर प्रदेशको स्थानीय तह निर्वाचन परिणाममा सकारात्मक सन्देश प्रवाह गर्ने उद्देश्यले नेतालाई मधेसमै बोलाएर बैठक गर्न लागिएको प्रवक्ता पम्फा भुसालले बताइन् । मधेसमा माओवादी प्रभाव जबर्जस्त रूपमा स्थापित हुँदै गएको सन्देश दिन खोजिएको भुसालले बताइन् ।
यसअघि दुई नम्बर प्रदेशको बैठकले पार्टीको सिंगो ‘हेडक्वार्टर' निर्वाचन अवधिभर मधेसमै रहने माओवादीले जनाएको थियो । त्यही निर्णयका आधारमा अध्यक्ष पुष्पकमल दाहाल, वरिष्ठ नेता नारायणकाजी श्रेष्ठ, रामबहादुर थापा, प्रदेश इन्चार्ज मात्रिका यादवलगायत नेता मधेसमै सक्रिय छन् । दाहाललगायत शीर्ष नेता भदौ १२ मै मधेस झरेका हुन् । केन्द्रीय सचिवालयको बैठक सकेर भदौ १८ गते मात्रै उनी काठमाडौं आउने कार्यक्रम रहेको उनको निजी सचिवालयले जनाएको छ ।
‘हेडक्वार्टर' विघटन गरी सचिवालयलाई नै सर्वोच्च कार्यकारी संरचना बनाएपछि माओवादीले पहिलो बैठक मधेसमा गर्न लागेको हो ।
माओवादी सचिवालयमा अहिले ८२ नेता छन् । ९९ सदस्यीय यो कमिटीमा अन्य पद भने रिक्त छ । रिक्त पदमा पार्टी एकता प्रक्रियाबाट आएका नेतालाई समेटेर पूर्णता दिने तयारी भइरहेको नेता बताउँछन् । बुधबार मात्रै सर्लाहीबाट फोरम लोकतान्त्रिकका उपाध्यक्ष रामेश्वर राय यादवलगायत नेता प्रवेश गरेका छन् । यसअगाडि नयाँ शक्ति छाडेर रामचन्द्र झा, देवेन्द्र पौडेल, रामकुमार शर्मा, वामदेव क्षेत्री, कुमार पौडेल, महेन्द्र पासवान, सद्भावनाका संस्थापक महासचिव अनिस अन्सारीलगायत नेता प्रवेश गरिसकेका छन् ।
वीरगन्जमा बस्ने बैठकले एकता प्रक्रियामा आएका नेताको कार्यविभाजन गर्ने, साउन पहिलो साताको बैठकको म्यान्डेटअनुसार जम्बो केन्द्रीय आयोजक समिति विघटन गर्ने, दुई अंकको केन्द्रीय समिति बनाउने र दुई नम्बर प्रदेशको स्थानीय तह निर्वाचनको चुनावी रणनीतिका विषयमा केन्द्रित रहेर छलफल गर्नेछ । १३६ वटै स्थानीय तहमा उम्मेदवार टुंगो लगाएर बैठकबाट अनुमोदन गराउने तयारी माओवादीले गरेको छ ।
प्रतिक्रिया दिनुहोस !
