सडक बालबालिकाको विश्व कप सपना
काठमाडौं : सेल्टर आश्रय नेपालको आयोजनामा भदौ २१ देखि २३ गतेसम्म सडक बालबालिकाको लिग फुटबल प्रतियोगिता हुने भएको छ । सेल्टर आश्रय नेपालले अखिल नेपाल फुटबल संघ (एन्फा) को प्राविधिक सहयोगमा प्रतियोगिता सञ्चान गर्न लागेको हो । लिगमा सडक बालबालिकाको क्षेत्रमा काम गरिरहेका विभिन्न १५ वटा संस्थाका १४ टोलीको सहभागिता रहने जानकारी बुधबार आयोजित पत्रकार सम्मेलनमा सेल्टर आ श्रय नेपालकी अध्यक्ष खुश्बु ओलीले दिइन् ।
लिगकम नकआउटका आधारमा खेलाइने प्रतियोगितामा सहभागी टोलीलाई चार समूहमा विभाजन गरिएको छ । सेभेन ए साइड ढाँचामा खेलाइने लिग दशरथ रंगशालामा हुनेछ । लिगमा उत्कृष्ट प्रदर्शन गर्ने खेलाडीलाई सन् २०१८ को मे १९ देखि २७ तारिखसम्म रुसको मस्कोमा आयोजना हुने सडक तथा असहाय बालबालिकाको विश्वकप फुटबलमा सहभागी गराइने छ ।
लिगका खेल ३० मिनेट र सहभागी खेलाडीको उमेर १४ देखि १६ वर्षको हुने आयोजकले जनाएको छ । विश्व कपमा २२ देशका २४ वटा टोलीको सहभागिता रहनेछ, जसमा १२ छात्र र १२ छात्रा टोलीले प्रतिस्पर्धा गर्नेछन् । नेपालले छात्र स्पर्धामा मात्र भाग लिनेछ । लिगबाट सुरुमा १८ जना खेलाडी छनोट गरी एक महिना विश्वकपको प्रशिक्षण क्याम्पमा राखिने बताइएको छ ।
प्रशिक्षण क्याम्पबाट उत्कृष्ट नौ जनालाई विश्वकप टोलीमा समावेश गरिनेछ । एन्फाका प्रमुख कार्यकारी अधिकृत इन्द्रमान तुुलाधरले एन्फाले आफ्नो सामाजिक उत्तरदायित्वअन्तर्गत सडक बालबालिकाको लिगका लागि प्राविधिक सहयोग गरेको बताए । उनले लिगमा उत्कृष्ट प्रदर्शन गर्ने खेलाडीलाई एन्फा एकेडेमीको टोलीका समावेश गर्न सकिने जानकारी पनि दिए । आगामी वर्षदेखि सडक बालबालिकाको लिग फुटबललाई एन्फाले आफ्नो क्यालेन्डरमा समावेश गर्नेछ,’ तुलाधरले भने।