बंगलादेशमाथि नेपालको रोमाञ्चक जित
काठमाडौं : नेपालले बंगलादेशसँगको दोस्रो मैत्रीपूर्ण भलिबल खेलमा पनि रोमाञ्चक जित हात पारेको छ । बुधबार ललितपुरस्थित नेपाली सेनाको शारीरिक तालिम तथा प्रशिक्षण केन्द्रको कर्भडहलमा भएको खेलमा नेपालले बंगलादेशमाथि ३-२ को जित निकाल्यो । तर, बुधबारको खेलमा नेपालको रिसिभ निकै खराब रह्यो । बंगलादेशी खेलाडीको सहज सर्भिसमा पनि नेपाली खेलाडीले रिसिभ खराब गरे ।
नेपालले सेटमा अग्रता बनाउँदा नेगेटिभ अंकबाट पछि परेको थियो । नेपाली टोलीले स्पाइककै भरमा पाँचौं सेटमार्फत जित निकाल्यो । पहिलो मैत्रीपूर्ण खेलमा जित निकालिसकेको नेपाली टोलीले सहजै खेल आफ्ना पक्षमा पार्ने आकलन गरिए पनि घरेलु टोलीले निराशलाग्दो प्रदर्शन गरेको थियो । निकै खराब रिसिभ गरेपछि पहिलो सेट नेपालले २५-१९ ले गुमायो । दोस्रो सेट नेपालले २५-२३ ले आफ्नो पक्षमा पार्दै सेटमा १-१ को बराबरी गर्यो ।
तर, बंगलादेशले तेस्रो सेट २५-२० ले सहजै आफ्नो पक्षमा पारेपछि सेटमा २-१ अग्रता बनायो । निकै प्रतिस्पर्धात्मक भएको चौथो सेट २५-२२ ले नेपालले आफ्नो बनाएपछि सेटमा २-२ को बराबरी भयो । निर्णायक तथा पाचौं सेट १५-८ ले नेपालले सहजै आफ्नो पक्षमा पारेपछि नेपालले दोस्रो मैत्रीपूर्ण खेलमा पनि जित निकाल्यो । नेपालका लागि कुलबहादुर थापाले पुनः उत्कृष्ट प्रदर्शन गरे । उनले कुल २८ अंकको महत्वपूर्ण योगदान दिएका थिए ।
कुलबहादुर असफल हुँदा आठ अंक विपक्षीले प्राप्त गरेको थियो । नेपालका अन्य स्पाइकरले दोहोरो अंक छुन सकेनन् । नेपालका लागि निकै आशा गरिएको स्पाइकर मानबहादुर श्रेष्ठको प्रदर्शन खराब रह्यो । पाचौं सेटमा बंगलादेशी खेलाडीले नेपाली रेफ्री चन्द्रा वन्दना राईको निर्णयमा पटकपटक असन्तुष्टि जनाए । खेलपश्चात् बंगलादेशका प्रशिक्षक अलि पौउर एरोजीले प्रतिक्रियासमेत दिन मानेनन्।
नेपालका प्रशिक्षक जगदीश भट्टले नेपाली खेलाडीले आशा गरेअनुरूप प्रदर्शन गर्न नसकेको बताए । उनले भने, 'पहिलो सेटमा हाम्रा खेलाडीको रिसिभ निकै खराब रह्यो । त्यसैले पहिलो सेट गुमाएपछि थप दबाब परे । त्यसमा बंगलादेशी खेलाडीले पनि हिजोभन्दा निकै खेल खेले ।’ नेदरल्यान्डका प्रशिक्षकबाट एकमहिने प्रशिक्षण लिएको नेपाली टोलीले यसअघि डेनमार्कको घरेलु क्लबसँगको मैत्रीपूर्ण खेलमा समेत जित निकालेको थियो । नेपाली पुरुष भलिबल टोलीको स्तरवृद्धि र नियमित तयारीका लागि नेपाल भलिबल संघको आग्रहमा बंगलादेशको टोली मैत्रीपूर्ण खेलका लागि नेपाल आएको हो।
भलिबल खेलाडीलाई नगद पुरस्कार माल्दिभ्सको मालेमा गत चैत ९ देखि १७ गतेसम्म सञ्चालन भएको एभीसी एसियन सेन्टर जोन तेस्रो सिनियर भलिबल प्रतियोगितामा तेस्रो स्थान हासिल गर्न सफल नेपाली पुरुष भलिबल खेलाडी बुधबार नगद पुरस्कारसहित सम्मानित भएका छन् । युवा तथा खेलकुदमन्त्री राजेन्द्रकुमार केसी, मन्त्रालयका सचिव महेश दाहाल, नेपाल भलिबल संघका अध्यक्ष मनोरञ्जनरमण शर्मा लगायतले खेलाडीलाई पुरस्कृत गरेका हुन् । खेलाडी, प्रशिक्षक र व्यवस्थापक गरी १५ जनाले जनही एक÷एक लाख रुपैयाँ नगद पुरस्कार प्राप्त गरे ।
प्रतिक्रिया दिनुहोस !
