गाडी किन्न ब्याजदरमा छुट

काठमाडौं : नाडा अटो सोलाई लक्ष्य गरेर अधिकांश वाणिज्य बैंकले ब्याजदरमा विशेष छुट दिएका छन् । नाडा अटो सोमा आउने ग्राहकलाई आकर्षित गर्न बैंकहरूले कम ब्याजदरमा गाडी किन्ने योजना सार्वजनिक गरेका हुन् । अटो सोमा आउने ग्राहकलाई बैंक कर्जाबारे जानकारी दिने गरेको सानिमा बैंक महाराजगन्ज शाखा प्रमुख राजु महर्जनले जानकारी दिए । अटो सोमा न्यूनतम १० दशमलव ८२ प्रतिशतदेखि साढे १२ प्रतिशतसम्म ब्याजदरमा कर्जा प्रवाह गर्ने व्यवस्था गरिएको छ । मेलामा गाडी बुक गर्नेले एक महिनासम्म हाल तोकिएको ब्याजदरमा कर्जा उपभोग गर्न पाउनेछन् ।

गतवर्ष नाडा अटो सोमा बैंकहरूले करिब ६ देखि ७ प्रतिशत ब्याजदरमा लोन दिने व्यवस्था मिलाएका थिए । यस वर्ष बैंकहरूले लगानीयोग्य पुँजी अभाव भएका बेला बढाएको ब्याजदर नघटाएका कारण गाडी लिन चाहने ग्राहकले दोब्बर ब्याज तिर्नुपर्ने भएको छ । बैंकसँग थप ऋण दिने क्षमता नभए पनि ग्राहकलाई आकर्षित गर्न नाडा अटो सोमा ब्याजदर भने केही कम गरेका छन् ।

अटो सोमा लिएको कर्जा ग्राहकले पाँचदेखि नौवर्षसम्म किस्ताबन्दी रूपमा तिर्न सक्नेछन् । बैंकका हरेक स्टलमा औसतमा दैनिक एक सयजनाले गाडी खरिदका लागि नाम दर्ता गर्ने गरेका छन् । यसले बैंक मात्र नभई गाडी व्यवसायी पनि उत्साहित बनेका छन् । नेपाल राष्ट्र बैंकले चालू आर्थिक वर्षको मौद्रिक नीतिमार्फत गाडी खरिद गर्न ३५ प्रतिशतमात्र डाउन पेमेन्ट गरे पुग्ने व्यवस्था गरेको छ । यसअघि खरिदकर्ताले गाडीको मूल्यको आधा रकम तिरेपछि मात्र अन्य किस्ता बैंकमार्फत तिर्न पाउने व्यवस्था थियो ।

अटो सोमा स्टल राखेका बैंकले स्टलबाटै सवारीसाधन बुक गर्ने सुविधासमेत दिएका छन् । स्टल राखेकामध्ये सबैभन्दा सस्तो ब्याजदर स्ट्यान्डर्ड चार्टर्ड बैंकको छ । बैंकले नौ दशमलव ४७ प्रतिशत ब्याजदरमा कर्जा प्रभाव गर्ने भएको छ । बैंकले आधार दर ६ दशमलव ४७ प्रतिशतमा साढे दुईदेखि साढे तीन प्रतिशत ब्याजदर जोडेर ऋण दिने जनाएको छ । ग्राहकलाई आकर्षित गर्न बैंकले टिम नै बनाएर समूह परिचालन गरेको छ । १० जनाको टिमले औसतमा एक दिनमा १० देखि १२ जनालाई बैंक लोन र तिर्नुपर्ने प्रक्रियाबारे जानकारी दिइरहेको बैंकका कर्जा अधिकृत राजन खड्काले जानकारी दिए ।

हिमालयन बैंकले निजी गाडीका लागि १० दशमलव ४४ र व्यापारिक प्रयोजनका लागि ११ दशमलव ४४ प्रतिशत ब्याजमा ऋण दिने अफर ल्याएको कर्जा अधिकृत रेश्मा मास्केले बताइन् । बैंकले निजीलाई आठ र व्यापारिक प्रयोजनमा पाँच वर्ष अवधिका लागि ऋण दिने व्यवस्था गरेको छ । उक्त बैंकबाट कर्जा लिने ग्राहकले मासिक समान रूपमा ब्याज भुक्तान गर्नुपर्ने व्यवस्था बैंकले गरेको छ ।

बैंकहरूसँग थप ऋण दिने क्षमता नभए पनि ग्राहक आकर्षित गर्न ब्याजदर घटाएका हुन् ।

‘सपनालाई परिवर्तन गर वास्तविकतामा' भन्ने नारासहित माछापुच्छ्रे बैंकले सेवाशुल्कमा छुटसहितको योजना सार्वजनिक गरेको छ । १० दशमलव ५ प्रतिशत ब्याजदरमा आठ वर्षका लागि ऋण दिने योजना सार्वजनिक गरेको हो । एनएबी बैंकले १० दशमलव ९९ प्रतिशत स्थिर ब्याजदर कायम गरेर निजी सवारीसाधनका लागि पाँच वर्ष र व्यापारीका लागि ६ वर्षे अवधिको स्किम ल्याएको छ । मेलामा गाडी बुकिङ गर्न चिनजानका मानिस र नियमित ग्राहक बढी आउने गरेको बैंकका सम्पर्क अधिकृत अमित कार्कीले बताए ।

बैंकले ११ दशमलव ४ प्रतिशत ब्याजमै ऋण उपलब्ध गराउने योजना ल्याएको बैंककी कर्जा अधिकृत शोभा न्यौपानेको भनाइ छ ।व्यापारिक प्रयोजनका लागि भने अधिकतम ब्याजदर १२ दशमलव ५ प्रतिशतसम्म छ । उनका अनुसार मध्यमस्तरका गाडी खरिद गर्नेको संख्या तुलनात्मक रूपमा बढी छ । बैंक अफ काठमान्डूले निजी सवारीसाधनका लागि ११ दशमलव ५७ र अन्य सवारीका लागि १२ दशमलव ५७ प्रतिशत ब्याजदर सार्वजनिक गरेको छ । ‘गुड्नुहोस् सबैभन्दा अगाडि' भन्ने नाराका साथ बैंक अफ काठमान्डूले मेलाबाटै सवारीसाधन बुक गर्ने स्किम ल्याएको छ ।

‘हाक्नुहोस् आफ्नो सपनाको गाडी' भन्ने नाराका साथ एनआईसी एसिया बैंकले व्यक्तिगत र व्यापारिक गरी दुई किसिमका स्किम सार्वजनिक गरेको छ । व्यक्तिगत सवारीसाधनका लागि बैंकले ११ दशमलव १५ र अन्य १२ दशमलवव ६५ प्रतिशत ब्याजदर निर्धारण गरेको छ । नाडामा सवारीसाधन कर्जा लिए सेवाशुल्कमा छुट दिने व्यवस्था पनि बैंकले गरेको कर्जा अधिकृत उकेश दाहालले जानकारी दिए ।

व्यक्तिगतलाई सात र व्यापारिक प्रयोजनमा ६ वर्षका लागि कर्जा दिने योजना बैंक ल्याएको छ । प्रभु बैंकले व्यक्तिगततर्फ १२.२६, व्यापारिक १४.५१ प्रतिशत ब्याजदरमा पाँच वर्षका लागि सवारीसाधन कर्जा उपलब्ध गराएको छ । सिभिल बैंकले ११ दशमवल ५९ प्रतिशतमा निजी र साढे १४ प्रतिशतमा अन्य सवारी कर्जाको ब्याजदर सार्वजनिक गरेको छ ।